چین نال ہور مضبوط شراکت داری وقت دی لوڑ: ڈار
پاکستان دے چین لئی نامزد سفیر علی اسد گیلانی دی نائب وزیراعظم نال ملاقات، اسحاق ڈار دا دورہ لاہور، داتا دربار حاضری، تعمیراتی کم جلد مکمل کرن دی ہدایت
لاہور، اسلام آباد نائب وزیراعظم تے وزیرِ خارجہ سینیٹر محمد اسحاق ڈار نے آکھیا اے کہ پاکستان چین نال اپنے آزمودہ، دیرینہ تے قابلِ اعتماد تعلقات نوں خصوصی اہمیت دیندا اے۔ دونویں ملکاں دے درمیان آہنی بھائی چارے تے سدابہار تذویراتی تعاون اُتے مبنی شراکت داری نوں ہور مضبوط تے گہرا کرنا وقت دی اہم لوڑ اے۔
پاکستان دے چین لئی نامزد سفیر علی اسد گیلانی نے نائب وزیراعظم تے وزیرِ خارجہ نال اسلام آباد وچ ملاقات کیتی، جس وچ دوطرفہ تعلقات تے مختلف شعبیاں وچ تعاون اُتے تبادلۂ خیال کیتا گیا۔
اسحاق ڈار نے آکھیا کہ پاکستان تے چین دی مضبوط شراکت داری کئی دہائیاں اُتے محیط اے، جس نوں باہمی تعاون دے ذریعے ہور اگے ودھایا جا سکدا اے۔
دریں اثنا داتا دربار لاہور دے دورے دے موقع اُتے نائب وزیراعظم نے مزار اُتے حاضری دِتی، فاتحہ خوانی کیتی تے ملک دی سلامتی، ترقی، خوشحالی تے استحکام لئی خصوصی دعا کیتی۔
ایس موقع اُتے اُنہاں آکھیا کہ حضرت علی ہجویریؒ المعروف حضرت داتا گنج بخشؒ دا مزار منفرد روحانی تے تاریخی اہمیت دا حامل اے، جتھے پاکستان تے بیرونِ ملک توں وڈی تعداد وچ زائرین حاضری دیندے نیں۔ ایس لئی اُنہاں نوں بہتر سہولتاں، جدید انفراسٹرکچر تے محفوظ تے باوقار ماحول دی فراہمی اولین ترجیحات وچ شامل ہونی چاہیدی اے۔
اسحاق ڈار نے داتا دربار کمپلیکس وچ جاری ترقیاتی کمّاں دا تفصیلی معائنہ کیتا تے منصوبے اُتے پیش رفت دا جائزہ لیا۔ نائب وزیراعظم نے ترقیاتی کمّاں اُتے اطمینان دا اظہار کردیاں محکمہ اوقاف تے متعلقہ محکمیان دیاں کاوشاں نوں سراہیا۔
اُنہاں ہدایت کیتی کہ تعمیراتی کمّاں وچ معیار یقینی بناندیاں منصوبہ مقررہ مدت وچ مکمل کیتا جاوے تے زائرین نوں ہر ممکن سہولت فراہم کیتی جاوے۔
