پٹرول دیاں قیمتاں وچ لگاتار اضافہ افسوسناک: سہیل آفریدی
غیر متعلقہ لوک حکومتی تے محکمانہ امور وچ مداخلت کر رہے نیں: کابینہ نوں خطاب، وزیراعلیٰ پختونخوا دے دورہ پنجاب دا روٹ میپ جاری، کل لاہور پہنچن گے
پشاور، لاہور وزیراعلیٰ خیبرپختونخوا سہیل آفریدی نے آکھیا اے کہ وفاق ولوں پٹرول دیاں قیمتاں وچ لگاتار اضافہ انتہائی افسوسناک اے، ایس اضافے دا بوجھ غریب عوام اُتے پے رہیا اے۔ عوامی مینڈیٹ اُتے ڈاکا مار کے مسلط ہون والیاں دا وطیرہ صرف اپنی جیبھاں بھرنا اے، عوام نوں ریلیف دینا انہاں دیاں ترجیحات وچ شامل نئیں۔ غیر متعلقہ لوک حکومتی تے محکمانہ امور وچ لگاتار مداخلت کر رہے نیں تے افسران نوں ڈرا دھمکا رہے نیں۔
صوبائی کابینہ دے اجلاس نوں خطاب کردیاں وزیراعلیٰ پختونخوا نے ہور آکھیا کہ اک پاسے پٹرول دیاں قیمتاں وچ اضافہ ہو رہیا اے تے دوجے پاسے قرضے لے کے ملک چلایا جا رہیا اے۔ 74 سالاں وچ 43 ہزار ارب روپے دا قرضہ لیا گیا، موجودہ جعلی حکومت نے پنج سالاں وچ قرضہ 97 ہزار ارب روپے تک پہنچا دِتا اے، ایہ بوجھ غریب عوام نوں چکنا پئے گا۔
اوہناں آکھیا کہ پنجاب دی جعلی وزیراعلیٰ دے حالیہ بیان دی بھرپور مذمت کردے آں، ذاتی مفادات دی خاطر قومی مفادات نوں نقصان پہنچانا اوہناں دا وطیرہ اے۔ پختونخوا دے خلاف وفاقی وزیراں دے بیاناں دی وی شدید مذمت کردے آں۔ پختونخوا دے عوام تے حکومت وچ تشویش اے کہ ساڈے نال کی کرن جا رہے نیں۔ چھوٹے صوبیاں خلاف تعصب بھری رویہ نفرتاں نوں ہور ودھاوے گا۔
وزیراعلیٰ پختونخوا نے آکھیا کہ این ایل سی دے سی اینڈ ڈبلیو منصوبیاں وچ ناقص کارکردگی تے کم نہ کرن دی وجہ نال بطور سپیشل اسسٹنٹ کجھ کنٹریکٹ منسوخ کیتے سن۔ غلط طریقے نال کنٹریکٹ حاصل کرن دی کوشش کامیاب نئیں ہووے گی۔ میں اپنی کابینہ تے افسران دے نال چٹان وانگ کھڑا آں، افسران نوں ڈران یا دھمکاؤن والیاں دے خلاف آخری حد تک کھڑا رہواں گا۔
دوجے پاسے پی ٹی آئی سینٹرل پنجاب نے وزیراعلیٰ خیبرپختونخوا دے دورہ پنجاب دا روٹ میپ جاری کر دِتا اے، جس دے مطابق سہیل آفریدی کل 14 ستمبر نوں لاہور پہنچن گے۔ سہیل آفریدی اج 13 ستمبر نوں داؤد خیل، پائی خیل تے روگڑی، سرگودھا، لالیاں تے چنیوٹ توں ہُندے ہوئے فیصل آباد پہنچ کے قیام کرن گے تے کل 14 ستمبر نوں شاہکوٹ تے شیخوپورہ توں ہُندے ہوئے لاہور پہنچن گے۔ دورے دا مقصد 27 ستمبر دی کال لئی پنجاب دے عوام نوں متحرک کرنا اے۔
