عالمی منڈی وچ ریٹ گھٹ، پاکستان وچ پٹرول 6.88 روپے فی لیٹر فیر مہنگا
پٹرول 391.22 روپے فی لیٹر ہو گیا، ڈیزل 5.62 روپے ودھ گیا، نویں قیمت 421.45 روپے
اسلام آباد پاکستان وچ پٹرول فیر مہنگا کر دِتا گیا، جدوں کہ عالمی منڈی وچ تیل سستا ہو گیا۔ وزارتِ پٹرولیم دے اعلامیے دے مطابق اوگرا نے پٹرولیم مصنوعات دیاں اج 17 ستمبر دیاں ایکس ڈپو قیمتاں دا تعین کر دِتا اے۔
ہائی سپیڈ ڈیزل دی قیمت وچ 5 روپے 62 پیسے فی لیٹر اضافہ کردیاں نویں قیمت 421 روپے 45 پیسے فی لیٹر مقرر کر دِتی گئی اے، جدوں کہ پٹرول دی قیمت وچ 6 روپے 88 پیسے فی لیٹر اضافہ کر کے نویں قیمت 391 روپے 22 پیسے فی لیٹر مقرر کیتی گئی اے۔
دریں اثنا سعودی عرب ولوں عمان دے راستے اضافی خام تیل دی کھیپ دی پیشکش دیاں اطلاعات سامنے آؤن توں بعد مشرقِ وسطیٰ توں تیل دی رسد وچ خلل نال متعلق خدشات وچ کمی آئی اے، تاہم یورپ وچ ڈیزل دیاں قیمتاں ریکارڈ بلند سطح دے نیڑے رہیاں۔
رائٹرز دے مطابق بدھ نوں ایہہ خبر سامنے آؤن توں بعد برینٹ خام تیل دے مستقبل دے کاروبار دی قیمت اک ڈالر 30 سینٹ، یعنی 1.2 فیصد گھٹ کے 107.45 ڈالر فی بیرل ہو گئی۔
امریکی ویسٹ ٹیکساس انٹرمیڈیٹ (ڈبلیو ٹی آئی) دی قیمت اک ڈالر 96 سینٹ، یعنی 1.85 فیصد کمی نال 103.87 ڈالر فی بیرل رہی۔
