مکّہ معاہدہ، ردِعمل دا فیصلہ تِنّے ملک کرن گے: فوجی ترجمان
دفاعی وعدیاں اُتے عمل درآمد دا عملی طریقہ کار عوام دے سامنے ظاہر نہیں کیتا جاندا
راولپنڈی (خصوصی نیوز رپورٹر، مانیٹرنگ ڈیسک) ڈائریکٹر جنرل آئی ایس پی آر لیفٹیننٹ جنرل احمد شریف نے آکھیا اے کہ مکّہ مشترکہ دفاعی معاہدے وچ شامل کسے اک ملک اُتے حملے دی صورت وچ تِنّے ملک باہمی مشاورت نال ردِعمل دا لائحہ عمل طے کرن گے تے فیر اوہدی مطابق اقدامات کیتے جان گے۔
انٹرویو وچ انہاں آکھیا کہ بھارت اپنی فوجی طاقت وچ اضافے لئی وڈے پیمانے اُتے وسائل خرچ کر ریا اے، جدوں کہ پاکستان دیاں دفاعی صلاحیتاں دا بنیادی مقصد ملکی دفاع اے۔ پاکستان اسلحے دی کسے دوڑ دا حصہ بنن دی کوشش نہیں کر ریا تے کسے دے خلاف جارحانہ عزائم نہیں رکھدا۔
پاکستان نوں اپنی دفاعی صلاحیتاں اُتے مکمل بھروسہ اے تے جارحیت دا جواب دین تے سزا دین دی صلاحیت وی رکھدا اے۔
سیاسی تے فوجی اہداف بارے سوال اُتے انہاں آکھیا کہ ملکی سیاسی مقاصد دا تعین سیاسی قیادت کردی اے۔ فوج تے ریاست دے مقاصد وکھ وکھ نہیں۔ قومی اہداف تے خواہشاں دا تعین سیاسی قیادت دے دائرہ اختیار وچ آؤندا اے۔
افغانستان دی صورتحال اُتے انہاں آکھیا کہ اقوامِ متحدہ دیاں رپورٹس وچ افغانستان وچ درجنوں دہشتگرد تنظیمیں دی موجودگی دا ذکر کیتا گیا اے۔ پاکستان دا مؤقف واضح اے کہ افغانستان نوں عالمی سطح اُتے دہشتگردی دا مرکز نہیں بننا چاہیدا۔
طالبان حکومت ایسے عناصر دی تربیت کر رہی اے جیہڑے پاکستان وچ دہشتگردی دیاں کارروائیاں وچ ملوث ہُندے نیں۔ پاکستان دا بنیادی مطالبہ صرف ایہہ اے کہ افغان سرزمین نوں پاکستان دے خلاف دہشتگردانہ سرگرمیاں لئی استعمال نہ ہون دِتا جائے۔
انہاں آکھیا کہ بلوچستان وچ کوئی بغاوت نہیں، ایہہ خالصتاً دہشتگردی اے۔ پاکستان شدت پسندی دے خلاف مہم جاری رکھے گا۔
مکّہ معاہدے دے تحت پاکستان دے ممکنہ ردِعمل بارے انہاں آکھیا کہ دفاعی وعدیاں اُتے عمل درآمد دا عملی طریقہ کار عوام دے سامنے ظاہر نہیں کیتا جاندا، کیوں جو فوجی کارروائیاں تے سکیورٹی نال جڑی حساس معلومات خفیہ رکھیاں جاندیاں نیں۔
انہاں واضح کیتا کہ معاہدے وچ شامل کسے ملک اُتے حملہ ہون دی صورت وچ ردِعمل دی نوعیت دا فیصلہ پاکستان، سعودی عرب تے ترکیہ حالات دا جائزہ مل کے کرن گے تے فیر اوس فیصلے دے مطابق کارروائی ہووے گی۔
مکّہ معاہدے اُتے کوئی اعتراض سامنے نہیں آیا۔ معاہدے دا بنیادی مقصد خطے وچ امن تے استحکام برقرار رکھنا تے مشترکہ دفاعی صلاحیت نوں مضبوط بنانا اے، جبکہ معاہدے وچ ہور ملک وی شامل ہو سکدے نیں۔
انہاں آکھیا کہ دنیا وچ دفاع نال متعلق ہور معاہدے وی موجود نیں، جنہاں وچ رکن ممالک اک دوجے نوں تعاون فراہم کرن دیاں یقین دہانیاں کراؤندے نیں۔
انہاں مزید آکھیا کہ معاہدے دے ناں توں وی واضح اے کہ ایہدا تعلق دفاعی تعاون نال اے تے ایس وچ کوئی جارحانہ پہلو شامل نہیں۔ ایہہ انتظام تِنّے ملکاں لئی معاونت دا ذریعہ اے، نہ کہ کسے دوجے ملک یا اتحاد دے خلاف اقدام۔
لیفٹیننٹ جنرل احمد شریف نے ایہہ وی واضح کیتا کہ مکّہ معاہدے وچ شامل پاکستان، سعودی عرب تے ترکیہ دوجے ملکاں نال اپنے آزادانہ تے وکھرے تعلقات برقرار رکھن گے۔
چین نال پاکستان دا تعلق انتہائی سٹریٹیجک نوعیت دا اے، ایس وچ مسابقت دا کوئی سوال ہی پیدا نہیں ہُندا۔ امریکا، ایران، چین تے ہور ملکاں نال پاکستان دے تعلقات میرٹ تے باہمی مفادات دی بنیاد اُتے قائم نیں۔
پاکستان خطے وچ امن تے استحکام دا سب توں وڈا حامی اے۔ امریکا تے ایران دے درمیان ثالثی لئی پاکستان سارے فریقاں نال رابطے وچ اے تاں جو ایس پیچیدہ صورتحال دا حل مذاکرات دے ذریعے لبھیا جا سکے۔
