اسلام آباد ہائیکورٹ نے لانگ مارچ توں پہلاں پی ٹی آئی رہنماواں نوں ہراساں تے گرفتار کرن توں روک دِتا

اسلام آباد اسلام آباد ہائیکورٹ دے جسٹس انعام امین منہاس نے 27 ستمبر لانگ مارچ توں پہلاں ہراساں کرن دے معاملے اُتے پی ٹی آئی اسلام آباد دے رہنماواں شعیب شاہین، ملک عامر علی تے ہوراں نوں ہراساں تے گرفتار کرن توں روکدیاں ایس ایس پی آپریشنز نوں ذاتی حیثیت وچ طلب کر لیا۔

درخواست اُتے سماعت دوران شعیب شاہین تے ریاست علی آزاد عدالت وچ پیش ہو کے آکھیا کہ لانگ مارچ توں پہلاں ورکرز دے گھراں اُتے چھاپے مارے جا رہے نیں تے سامان چوری کر لیندے نیں۔ اسی بیانِ حلفی تے سی سی ٹی وی فوٹیج فراہم کر دیندے آں۔ گرفتاری تے ہراسانی توں روکّن دا حکم دے کے اگلے ہفتے دی تاریخ رکھ لئی جائے۔

جسٹس انعام امین منہاس نے آکھیا کہ ایس ایس پی آپریشنز نوں بلا کے پچھ لیندے آں تے آرڈر وی کردے آں۔ عدالت نے احکامات جاری کردیاں سماعت ملتوی کر دِتی۔

علاوہ ازیں اسلام آباد ہائیکورٹ نے پی ٹی آئی رہنما رؤف حسن دا ناں ای سی ایل توں کڈھن بارے توہینِ عدالت دی درخواست نمٹا دِتی۔

ڈپٹی اٹارنی جنرل فیصل عرفان نے عدالت نوں دسیا کہ رؤف حسن دا ناں سفری پابندی دی فہرست توں کڈھ دِتا گیا اے۔ جسٹس راجہ انعام امین منہاس نے درخواست گزار نوں آکھیا کہ تہاڈا ناں سفری پابندی دی فہرست توں کڈھ دِتا گیا اے، اس لئی درخواست نمٹائی جا رہی اے۔