فیڈر دی بجائے ہُن ٹرانسفارمر توں بجلی بند کراں گے: اویس لغاری
ملک وچ کل 14 ہزار فیڈر، ساڑھے 3 ہزار اُتے چوری دی وجہ نال لوڈشیڈنگ اے
اسلام آباد (نامہ نگار) قومی اسمبلی دی قائمہ کمیٹی برائے توانائی وچ وفاقی وزیر توانائی اویس لغاری نے انکشاف کیتا کہ ملک وچ اکثر لوڈشیڈنگ والے فیڈراں دی وجہ ڈسکوز تے انہاں دا عملہ اے۔ اسی فیڈر دی بجائے ہُن ٹرانسفارمر توں بجلی بند کراں گے۔ ڈسکوز دا سسٹم اوورلوڈ ہو چکیا اے۔
ملک وچ 14 ہزار فیڈر نیں، ساڑھے 3 ہزار فیڈراں اُتے چوری دی وجہ نال لوڈشیڈنگ اے۔ ڈیمانڈ نوٹس وچ ملی بھگت نال لوڈ گھٹ لکھن دی وجہ نال سسٹم اُتے وڈا لوڈ پے ریا اے۔ بجلی دا عملہ رشوت لے کے تے مرغیاں کھا کے گھٹ لوڈ لکھوا کے سسٹم دا ستیاناس کروا ریا اے۔
کمیٹی دا اجلاس چیئرمین محمد ادریس دی زیرِ صدارت ہویا۔ وفاقی وزیر توانائی نے پاور سیکٹر وچ موجود نقائص، لوڈشیڈنگ تے اپنے ای محکمے دی کارکردگی دا پول کھولدیاں آکھیا کہ سسٹم نوں ٹھیک کرن لئی ہر فیڈر وچ 60 کروڑ توں 1 ارب روپے تک سرمایہ کاری درکار اے۔
انفراسٹرکچر دے مسائل حل کرن لئی ڈسکوز نوں جامع سرمایہ کاری دی ہدایت دِتی گئی اے۔ سسٹم اُتے سرمایہ کاری لئی 200 ارب روپے درکار ہون گے، جیہڑے صارفین توں 25 سالاں وچ ریکور کیتے جان گے۔
انہاں آکھیا کہ ایس رقم دا صارفین اُتے زیادہ بوجھ نہیں پئے گا، پر سسٹم اپ گریڈ ہو جائے گا۔ ڈسکوز نے اج تک سسٹم اُتے سرمایہ کاری نہیں کیتی۔
کمیٹی نوں اویس لغاری نے دسیا کہ وزیراعظم دی ہدایت اُتے ڈسکوز دی بہتری لئی پلان ترتیب دِتا گیا اے۔ ملک وچ 14 ہزار فیڈر نیں، ساڑھے 3 ہزار فیڈراں اُتے چوری دی وجہ نال لوڈشیڈنگ اے۔
ڈسکوز نوں لوڈشیڈنگ دی جتنی اجازت اے، اوس توں کئی گنا زیادہ لوڈشیڈنگ ہو رہی اے۔ انفراسٹرکچر نوں مضبوط بناؤن لئی سرمایہ کاری دی ہدایت کیتی گئی اے۔
وزیر توانائی نے دسیا کہ اسی فیڈر دی بجائے ہُن ٹرانسفارمر توں بجلی بند کراں گے۔ ایس نظام نال پورے فیڈر دی بجائے صرف اوس ٹرانسفارمر اُتے لوڈشیڈنگ ہووے گی۔ ہُن فیڈراں اُتے لوڈشیڈنگ نوں ٹرانسفارمر لیول اُتے لے کے جا رہے آں۔
وفاقی وزیر اویس لغاری نے آکھیا کہ میں مننا واں کہ ساڑھے چودہ ہزار فیڈراں وچوں ساڑھے 3 ہزار اُتے لوڈشیڈنگ ہو رہی اے۔ ایہہ لوڈشیڈنگ چوری تے لائن لاسز دی وجہ نال ہو رہی اے۔
اک سال بعد فیڈر توں بجلی بند کرن دی بجائے ٹرانسفارمر اُتے لے آواں گے۔ پیک آور وچ گیس دے پاور پلانٹ نہیں چلا رہے۔ گیس دا کارگو جیہڑا 3 کروڑ ڈالر دا ملدا سی، ہُن ساڑھے 9 کروڑ ڈالر توں ودھ گیا اے۔
