پیپس بھرتی معاملہ، ہائیکورٹ دا ریکارڈ لئی دوبارہ نوٹس

اسلام آباد (اپنے نامہ نگار توں) اسلام آباد ہائیکورٹ دے جسٹس ارباب محمد طاہر نے پاکستان انسٹیٹیوٹ آف پارلیمنٹری سروسز وچ بھرتی دے نتائج وچ مبینہ ردوبدل دے خلاف کیس وچ عدالتی حکم دے باوجود بھرتیاں دا ریکارڈ پیش نہ کرن اُتے دوبارہ نوٹس جاری کر دِتے۔

اسسٹنٹ ڈائریکٹر دی آسامی دے امیدوار احمد مجتبیٰ دی درخواست اُتے سماعت دوران عدالتی حکم دے باوجود ریکارڈ پیش نہ کیتا جا سکیا۔ جسٹس ارباب محمد طاہر نے اسسٹنٹ اٹارنی جنرل نوں آکھیا، ایہ بچہ اپنے حق لئی کھڑا اے، ایہ کیس ایتھے لیا کے آنا چنگی گل اے۔ تسی کدے قومی اسمبلی تے سینیٹ دے ملازماں دا ریکارڈ چیک کیتا؟ کدے چیک کرو کہ ملازم کنے رکھے گئے نیں تے جگہ کنی اے۔

جسٹس ارباب نے آکھیا کہ شہزاد شوکت صاحب موجود نہیں، اُنہاں نے التوا دی درخواست کیتی اے۔ عدالت نے سماعت 5 اکتوبر تک ملتوی کر دِتی۔

درخواست گزار نے 4 نومبر 2025 دے تبدیل شدہ نتائج دا عمل فوری معطل کرن، جواب دہندہ نمبر 5 دی اسسٹنٹ ڈائریکٹر پی ڈی پی تقرری، تنخواہ تے فرائض دی انجام دہی معطل کرن تے بھرتی دا ریکارڈ محفوظ رکھن، نالے اس وچ تبدیلی یا حذف کرن توں روکنے دی استدعا کر رکھی اے۔