مارکیٹاں رات 9 وجے، ہوٹل 11 وجے بند، سرکاری گاڑیاں دے فیول وچ 50 فیصد کمی، آئی ٹی آلات دے علاوہ ساریاں پائیدار اشیا دی خریداری ممنوع: ایندھن دی بچت لئی نویاں پابندیاں
شادی ہالز، مارکیز رات 10 وجے بند، 50 فیصد سرکاری گاڑیاں گراؤنڈ، نویاں گاڑیاں دی خریداری، بیرون ملک سرکاری دوریاں تے سفر اُتے مکمل پابندی، ناگزیر ہووے تے وزیر تے ہور عملہ اکانومی کلاس وچ جائے گا، سرکاری عشائییاں، سیمیناراں، تربیتی پروگراماں تے کانفرنسز اُتے وی پابندی، ویڈیو تے ٹیلی کانفرنسنگ اُتے اجلاس، شادی بیاہ وچ ون ڈش برقرار، پابندیاں 3 مہینیاں لئی، قربانی دا آغاز اشرافیہ توں کیتا جاوے گا: وزیراعظم
اسلام آباد وزیراعظم شہباز شریف نے مشرق وسطیٰ وچ کشیدگی دی وجہ نال عالمی منڈی وچ پٹرولیم مصنوعات دیاں قیمتاں وچ اضافے دے تناظر وچ ملک بھر وچ سادگی تے کفایت شعاری مہم دی منظوری دے دِتی اے، جس دے تحت ایندھن دی بچت لئی نویاں پابندیاں لائیاں گئیاں نیں۔ مارکیٹاں رات 9 وجے تے ہوٹل رات 11 وجے بند ہوون گے، سرکاری گاڑیاں دے فیول وچ 50 فیصد کمی کر دِتی گئی اے، جبکہ آئی ٹی آلات دے علاوہ ساریاں پائیدار اشیا دی خریداری ممنوع قرار دِتی گئی اے۔
ایہ فیصلہ اسلام آباد وچ وزیراعظم دی صدارت وچ ہون والے کفایت شعاری تے توانائی دے تحفظ دے اقدامات بارے اہم اجلاس وچ کیتا گیا۔ وزیراعظم نے آکھیا کہ عالمی منڈی وچ تیل دیاں قیمتاں وچ اضافے نال دنیا مہنگائی دی لپیٹ وچ اے، سب توں پہلاں حکومت تے اشرافیہ توں قربانی دا آغاز کیتا جاوے گا۔ معاشی طور اُتے کمزور تے متوسط طبقے لئی فیول سبسڈی دا آغاز ہو چکیا اے۔
وزیراعظم نے آکھیا کہ موٹر سائیکل، رکشہ تے 800 سی سی گاڑیاں نوں 100 روپے فی لٹر دے حساب نال سبسڈی دِتی جا رہی اے۔ وزیراعظم نے سرکاری اخراجات وچ غیر ضروری کمی، قومی وسائل دے دانشمندانہ استعمال نوں یقینی بناؤن تے متعلقہ اداریاں نوں کفایت شعاری دے اقدامات اُتے مؤثر تے فوری عملدرآمد یقینی بناؤن دی ہدایت کیتی۔
اجلاس وچ حکومتی اخراجات وچ کمی، ایندھن دے تحفظ تے سرکاری وسائل دے مؤثر استعمال لئی اضافی کفایت شعاری دے اقدامات دا جائزہ لیا گیا۔ اجلاس وچ سرکاری گاڑیاں لئی ایندھن وچ تین مہینیاں لئی 50 فیصد کمی دے اقدام اُتے عملدرآمد دی منظوری دِتی گئی۔ ایمبولینساں، فائر بریگیڈ، قانون نافذ کرن والے اداریاں تے ضروری خدمات دیاں گاڑیاں ایس اقدام توں مستثنیٰ ہوون گیاں، جدوں کہ انتظامی یا غیر آپریشنل نوعیت دیاں گاڑیاں لئی استثنیٰ دی اجازت نہیں ہووے گی۔
اجلاس وچ مالی سال 2026-27 دے نان ای آر ای بجٹ وچ 5 فیصد کمی، سرکاری سطح اُتے ہر قسم دیاں نویاں گاڑیاں دی خریداری اُتے مکمل پابندی تے آئی ٹی دے علاوہ ساریاں پائیدار اشیا دی خریداری اُتے وی پابندی عائد کرن دی منظوری دِتی گئی۔
تین مہینیاں لئی سرکاری دوریاں تے بیرون ملک سفری سرگرمیاں اُتے وی پابندی عائد کر دِتی گئی اے۔ ناگزیر بیرون ملک دورے دی صورت وچ وزرا، مشیر، وزرائے مملکت، معاونینِ خصوصی تے سرکاری افسر اکانومی کلاس وچ سفر کرن گے۔
اجلاس وچ سرکاری امور لئی ویڈیو کانفرنسنگ تے ٹیلی کانفرنسنگ دے زیادہ توں زیادہ استعمال، سرکاری عشائییاں دے انعقاد اُتے پابندی، سوائے غیر ملکی وفود دے اعزاز وچ ضروری عشائییاں دے، تے حکومت دے زیر اہتمام سرکاری سیمیناراں، تربیتی پروگراماں تے کانفرنسز دے انعقاد وچ غیر ضروری اخراجات توں گریز کرن دی وی منظوری دِتی گئی۔
اجلاس وچ شادی بیاہ تے ہور تقریبات وچ سنگل ڈش دے اقدام اُتے وی عملدرآمد جاری رکھن دا فیصلہ کیتا گیا۔ دکاناں، مارکیٹاں، شاپنگ مالز، بازار تے ہور عمومی کاروباری مراکز رات 9 وجے، جبکہ شادی ہالز تے ہور تقریبات دے مقامات رات 10 وجے تک بند ہوون گے۔
ریستوراناں، کیفیاں، کھانے پین دے مراکز تے سٹینڈ الون فروٹ تے سبزی دیاں دکاناں لئی بندش دا وقت رات 11 وجے مقرر کرن دا فیصلہ کیتا گیا۔ فارمیسیز، طبی مراکز، ہسپتال، بیکریاں، پٹرول تے سی این جی سٹیشنز، الیکٹرک وہیکل چارجنگ سٹیشنز، جم، کھیل دیاں سہولتاں، آئی ٹی کمپنیاں تے کال سینٹرز نوں اوقاتِ کار دیاں پابندیاں توں استثنیٰ دے دِتا گیا اے۔
وزیراعظم نوں دسیا گیا کہ کفایت شعاری تے ایندھن دے تحفظ دے اقدامات دی نگرانی لئی قائم کمیٹی وزارتاں، ڈویژناں، محکماں، سرکاری اداریاں تے صوبائی حکومتاں توں عملدرآمد دیاں رپورٹس حاصل کرے گی، عدم تعمیل تے رکاوٹاں دی نشاندہی کرکے اصلاحی اقدامات تجویز کرے گی تے وزیراعظم نوں ہفتہ وار پیش رفت رپورٹ پیش کرے گی۔
وزیراعظم شہباز شریف نے ہدایت کیتی کہ کفایت شعاری دے اقدامات اُتے بلاامتیاز عملدرآمد یقینی بنایا جاوے تے حکومتی اخراجات وچ کمی دے نال نال توانائی تے ایندھن دے تحفظ لئی سارے ممکنہ اقدامات بروئے کار لیائے جان۔
وفاقی حکومت ولوں مالی سال 2026-27 وچ پہلے توں نافذ کفایت شعاری دے اقدامات نوں جاری رکھن دی منظوری وی دِتی جا چکی اے، جبکہ ایہ اقدامات وفاقی حکومت دے منسلک محکماں، سرکاری ملکیتی اداریاں، قانونی اداریاں تے ریگولیٹری اتھارٹیز اُتے وی لاگو ہوون گے۔
اجلاس وچ نائب وزیراعظم اسحاق ڈار، وفاقی وزرا احد خان چیمہ، علی پرویز ملک، عطا اللہ تارڑ تے متعلقہ اعلیٰ حکام نے شرکت کیتی۔
