جہاز دے استعمال اُتے پونے تین کروڑ دی ادائیگی، چاراں وزرائے اعلیٰ کول طیارے، تنقید صرف میرے اُتے کیوں؟ مریم نواز

9 ارب دا ایہ جہاز میرا نہیں، وزیراعلیٰ دا اے، اینوں چک کے رائیونڈ نہیں لے جاواں گی، چین، جاپان، ترکیہ تے آذربائیجان ایس جہاز اُتے گئی، آئندہ وی جاواں گی، جہاز اُتے سفر نہ کراں تے چنگ چی اُتے کراں؟ پختونخوا توں کجھ لوک حملہ آور ہون آئے، کسے نے پہچانیا تک نہیں، ہر ڈویژن وچ کینسر ہسپتال بناواں گی: ملتان وچ خطاب، کلاس نہم دے خراب امتحانی نتیجیاں اُتے ٹیچراں خلاف کارروائی دا فیصلہ

لاہور، ملتان وزیراعلیٰ پنجاب مریم نواز نے آکھیا اے کہ بیٹی دی گریجویشن تقریب وچ شرکت لئی لندن جان واسطے جہاز دے استعمال اُتے پونے 3 کروڑ روپے ادا کر دِتے، چاراں وزرائے اعلیٰ کول طیارے نیں، تنقید صرف میرے اُتے کیوں؟ تنقید میرے اُتے نہیں بلکہ پنجاب دی ترقی اُتے ہو رہی اے۔ میں تاں پنج سال ایسے جوش تے جذبے تے سپیڈ نال کم کراں گی، ہنیں آغاز اے، ڈھائی سال ہور مل گئے تاں جنوبی پنجاب دا نقشہ بدل جاوے گا۔

اوہناں آکھیا کہ ہر کوئی اٹھ کے آکھدا اے پنجاب نے ساڈا حق کھا لیا، پنجاب نے کسے دا حق نہیں کھادھا بلکہ اپنے حصے وچوں دوجیاں نوں دیندا رہیا اے۔ پنجاب دے ہر ڈویژن وچ کینسر ٹریٹمنٹ ہسپتال بناواں گے۔ ایہ گلّاں اوہناں گزشتہ روز ملتان وچ الیکٹرک بس سروس دی افتتاحی تقریب توں خطاب کردیاں کیتیاں۔

دریں اثناء وزیراعلیٰ پنجاب نے دورہ لندن دوران سرکاری طیارے اُتے آن والے اخراجات دا چیک دے دِتا۔ اوہناں سرکاری جہاز اُتے رواں ماہ 5 توں 9 ستمبر تک لندن دا دورہ کیتا سی۔ سرکاری طیارے دے استعمال دی مد وچ پنجاب حکومت نوں 2 کروڑ 71 لاکھ 94 ہزار 4 روپے دی رقم دا چیک دِتا گیا۔

مزید براں تقریب توں خطاب وچ مریم نواز شریف نے سرکاری جہاز استعمال کرن دے کرائے دی ادائیگی دی رسید دکھاندیاں آکھیا کہ 9 ارب روپے دا ایہ جہاز میرا نہیں، وزیراعلیٰ پنجاب دا اے، اینوں چک کے رائیونڈ نہیں لے جاواں گی۔ چین، جاپان، ترکیہ تے آذربائیجان ایس جہاز اُتے گئی آں، آئندہ وی جاواں گی۔ جہاز اُتے سفر نہ کراں تے کی چنگ چی اُتے کراں؟ وزٹ لئی جانا پئے تاں کس جہاز اُتے جاواں گی؟ کی سیلاب دوران عوام دے درمیان موجود نہیں سی؟

اوہناں مزید آکھیا کہ 9 ارب روپے دے جہاز اُتے گل کردے او، ارباں روپے دے ترقیاتی منصوبیاں اُتے گل کیوں نہیں کردے؟ میں وی لاگرز تے یوٹیوبرز نوں جوابدہ نہیں آں، اللہ تعالیٰ تے عوام نوں جوابدہ آں۔ میں کرایہ ادا کرکے رسید ساریاں نوں دکھا دِتی اے۔ پنجاب وچ ارباں روپے دے پراجیکٹ چل رہے نیں۔ اللہ نوں حاضر ناظر جان کے آکھدی آں کہ اک روپے دی وی خیانت نہیں کیتی۔ عوام دے خون پسینے تے محنت دی کمائی سوچ سمجھ کے خرچ کردے آں، آپ خیانت نہیں کردی تے نہ کسے نوں کرن دیندی آں۔

مریم نواز نے آکھیا کہ چند روزاں وچ 600 پولیس والے رشوت خوری اُتے گرفتار کیتے گئے، ریونیو تے اینٹی کرپشن دے لوک وی پکڑے گئے۔ اوہناں آکھیا کہ پختونخوا توں کجھ لوک حملہ آور ہون آئے، سڑک کنارے بیٹھے رہے، کسے نے پہچانیا تک نہیں۔ جدوں کسے نے نہیں پہچانیا تاں بادلِ نخواستہ آپ نوں اغوا کرانا پیا۔ کے پی کے توں آن والے اڑھائی افراد دا جلوس گزر رہیا سی، دکاندار توں کرسی منگی تاں اوہنے آکھیا کہ نہیں دیواں گا، چوری ہو جاوے گی۔ پنجاب دے عوام چنگی طرح جان دے نیں کہ اصل چور کون نیں تے کون چوریاں کردا اے۔ ڈی سی لاہور نوں آکھیا کہ مہمان آئے سن تاں کجھ خیال کردے، 4،5 سو بندے ہی بھیج دیندے۔

وزیراعلیٰ پنجاب نے آکھیا کہ کسے دے منہ توں اپنے صوبے نوں پنجاب توں بہتر کرن والا جملہ سنن لئی کان ترس گئے نیں۔ پنجاب وچ کارڈیالوجی، کینسر تے ہور وڈے وڈے ہسپتال بن رہے نیں۔ پی کے ایل آئی دے بعد ہن دوجی پیٹ سکین مشین ملتان وچ لائی گئی اے۔ جناح انسٹیٹیوٹ آف کارڈیالوجی وچ غریباں دا مفت علاج ہووے گا۔ پنجاب دے ہر ڈویژن وچ کینسر ہسپتال بنا کے جاواں گی، جنہاں نوں 12 مہینیاں وچ فنکشنل کر دِتا جاوے گا۔

اوہناں آکھیا کہ ہزار گرین بسیں دا اعلان کیتا سی، تاں 5 ہزار بسیں دے کے جاواں گی۔ ملتان وچ بہت جلد 160 الیکٹرک بسیں چلنا شروع ہو جان گیاں۔ ہن پنجاب دے ہر ضلعے تے ہر تحصیل وچ الیکٹرک بس چلے گی۔ پنجاب بھر وچ 300 نواز شریف سکولز آف ایمننس بن رہے نیں۔ طلبہ نوں اک لاکھ ای بائیکس دین جا رہے نیں۔ درخواست دین دی آخری تاریخ 4 اکتوبر اے، پر ہن تک 3 لاکھ درخواستاں آ چکیاں نیں۔ ہن پنجاب بھر وچ طالبات سکوٹی چلانیاں نظر آون گیاں کیونکہ ہن پنجاب محفوظ اے۔ لاء اینڈ آرڈر دی بہتری لئی ایسے اوکھے فیصلے کیتے نیں جنہاں نوں میں جان دی آں تے میرا رب جاندا اے۔

ادھر وزیراعلیٰ پنجاب دی زیرِ صدارت ویڈیو لنک اجلاس ہویا، جس وچ سکول ایجوکیشن اُتے تفصیلی بریفنگ دِتی گئی۔ ایس موقع اُتے مریم نواز نے کلاس نہم دے امتحانی نتیجیاں اُتے خفگی دا اظہار کیتا۔ خراب امتحانی نتیجے والے ٹیچراں خلاف قانونی کارروائی کرن تے نواں آرڈیننس لیاؤن دا فیصلہ کیتا گیا۔ اگلے ہفتے مکمل ٹائم لائن تے ریفارمز پلان پیش کرن تے نویں جماعت دے 20 فیصد توں گھٹ رزلٹ اُتے فوری ایکشن دا حکم دِتا گیا۔

وزیراعلیٰ نے آؤٹ سورس سکولاں دی کارکردگی رپورٹ وی منگوا لئی۔ اوہناں بہترین نتیجے والے سکولاں لئی انعامات، 45 دناں وچ ہیڈ ٹیچراں دیاں خالی آسامیاں پُر کرن تے سرکاری سکولاں وچ سبجیکٹ سپیشلسٹ دی تعیناتی یقینی بناؤن دی ہدایت کیتی۔ مزید براں سکولاں دی مانیٹرنگ لئی یونیفائیڈ مانیٹرنگ ایپ متعارف کراؤن دا فیصلہ کیتا گیا۔

دوجے پاسے وزیراعلیٰ پنجاب نے مریضاں دے تحفظ دے عالمی دن اُتے اپنے پیغام وچ آکھیا کہ پنجاب وچ مریضاں نوں محفوظ، معیاری تے بروقت طبی سہولتاں دی فراہمی یقینی بنا رہے آں۔