سعودی عرب دے دفاع لئی اسیں کسے وی حد تک جاواں گے: ڈی جی آئی ایس پی آر
پاکستان سفارتی تے عملی طور اُتے سعودی عرب دے نال کھڑا اے، ایس بارے کوئی شک نہیں ہونا چاہیدا۔ سعودی سلامتی دے حوالے نال ساڈا عزم غیر مشروط اے، لیفٹیننٹ جنرل احمد شریف دا عرب نیوز نوں انٹرویو
اسلام آباد (مانیٹرنگ ڈیسک) پاک فوج دے ترجمان لیفٹیننٹ جنرل احمد شریف نے آکھیا کہ پاکستان سفارتی تے عملی طور اُتے سعودی عرب دے نال کھڑا اے۔ میں ایتھے ’’عملی طور اُتے‘‘ دے لفظ اُتے زور دینا چاہواں گا، سعودی عرب دے دفاع لئی اسیں کسے وی حد تک جاواں گے۔
ڈی جی آئی ایس پی آر احمد شریف نے آکھیا کہ پاکستان دا عزم سعودی عرب تے اسلام دے دو مقدس ترین مقاماں، مکہ تے مدینہ دے تحفظ تک پھیلیا ہویا اے۔ ایس بارے کوئی شک نہیں ہونا چاہیدا۔ مختصراً ایہ کہ اسیں سعودی عرب دے نال آں تے سعودی عرب خلاف کسے وی جارحیت دی صورت وچ اوہدا دفاع کردے رہواں گے۔
ایہ بیان رواں برس 7 اگست نوں مکہ مشترکہ دفاعی معاہدے اُتے دستخط توں اک ماہ توں کجھ ودھ عرصہ گزرن توں بعد سامنے آیا اے۔ سعودی عرب وچ پہلاں توں ہی پاکستانی فوجیاں دی معقول تعداد موجود اے۔
لیفٹیننٹ جنرل احمد شریف دا کہنا سی کہ سعودی سلامتی دے حوالے نال ساڈا عزم غیر مشروط اے، کیونکہ پاکستان تے سعودی عرب دے عوام، دوناں ملکاں دی سیاسی تے فوجی قیادت وچ ڈونگھے، تاریخی تے مضبوط تعلقات قائم نیں۔
جدوں لیفٹیننٹ جنرل احمد شریف توں پچھیا گیا کہ کی سعودی عرب نے پاکستان توں ہور فوجی دستے، فضائی دفاعی نظام یا حوثیاں خلاف کارروائی وچ براہِ راست شرکت دی درخواست کیتی اے، تاں اوہناں ایس گل دی نہ تصدیق کیتی تے نہ تردید۔
