27 ستمبر: وزیراعلیٰ پختونخوا دی اچکزئی، علامہ ناصر نال ملاقات
اختلاف دباؤن لئی طاقت دا استعمال آئینی آزادیواں دے منافی: اپوزیشن قائدین، ن لیگ پنجاب وچ پی ٹی آئی توں وڈا جلسہ کرکے وکھاوے، سیاست چھڈ دیواں گا: آفریدی
پشاور وزیراعلیٰ خیبرپختونخوا سہیل آفریدی نے گزشتہ روز اپوزیشن لیڈر قومی اسمبلی محمود خان اچکزئی تے اپوزیشن لیڈر سینیٹ علامہ ناصر عباس نال ملاقات کیتی۔ ایس دوران 27 ستمبر دے مارچ تے اگے دی سیاسی تے جمہوری حکمتِ عملی اُتے تفصیلی تبادلہ خیال کیتا گیا۔
اپوزیشن قائدین نے سہیل آفریدی دی پُرامن سٹریٹ موومنٹ نوں سراہیا تے پنجاب حکومت ولوں سیاسی کارکنان دے خلاف کیتے گئے اقدامات دی سخت مذمت کیتی۔ اوہناں آکھیا کہ سیاسی اختلاف نوں دباؤن لئی ریاستی طاقت دا استعمال جمہوری قدراں تے آئینی آزادیواں دے منافی اے، عوام اپنے حقاں لئی 27 ستمبر نوں سڑکاں اُتے نکلن گے۔
دوجے پاسے سہیل آفریدی نے اپنے بیان وچ مسلم لیگ (ن) نوں چیلنج کردیاں آکھیا اے کہ پنجاب دے کسے وی شہر وچ پی ٹی آئی دے مقابلے وچ وڈا جلسہ کرکے وکھاوے تاں اوہ سیاست چھڈن لئی تیار نیں۔ شرط صرف ایہہ اے کہ دوناں جماعتاں نوں مکمل تے برابر لیول پلیئنگ فیلڈ دِتی جاوے۔
اوہناں آکھیا کہ جے پی ٹی آئی دا جلسہ وڈا ہویا تاں مسلم لیگ (ن) نوں پنجاب دے عوام دے سامنے اپنے عوامی مینڈیٹ بارے اٹھن والے سوالاں، ظلم و جبر تے بدترین کارکردگی اُتے جواب دینا پئے گا تے عوام توں معذرت کرنی پئے گی۔
جے اوہناں نوں عوامی مقبولیت اُتے اعتماد اے تاں آؤ میدان وچ آ کے عوام دی طاقت دا فیصلہ ہون دیو، جیویں عوام نے 8 فروری دے دن تحریک انصاف نوں دو تہائی اکثریت دے کے فیصلہ کیتا سی۔
