پختونخوا وچ جھڑپاں، 10 خوارج ہلاک، 6 سکیورٹی اہلکار شہید
سکیورٹی فورسز دی شمالی وزیرستان وچ کارروائی دوران 6، ہنگو وچ 4 خوارج ہلاک ہوئے، اہلکاراں اُتے دستی بم نال حملہ کیتا گیا۔ ہلاک خوارج کولوں اسلحہ تے گولہ بارود برآمد، بلوچستان وچ آواران دے علاقے بدرنگ وچ کارروائی، 3 دہشتگرد مارے گئے۔
اسلام آباد، کوئٹہ پختونخوا وچ سکیورٹی فورسز نال مختلف جھڑپاں وچ بھارتی سرپرستی وچ سرگرم فتنہ الخوارج نال تعلق رکھن والے 10 دہشتگرد ہلاک ہو گئے، جدوں کہ دیسی ساختہ بم دے حملے وچ 6 سکیورٹی اہلکار شہید ہو گئے۔ دوجے پاسے بلوچستان دے ضلع آواران وچ وی سکیورٹی فورسز دی مؤثر کارروائی دوران 3 دہشتگرد مارے گئے۔
آئی ایس پی آر دے مطابق خیبر پختونخوا وچ سکیورٹی فورسز نے 15 توں 17 ستمبر 2026 دے دوران شمالی وزیرستان وچ خوارج دی موجودگی دی اطلاع اُتے انٹیلی جنس دی بنیاد اُتے کارروائی کیتی تے خوارج دے ٹھکانے نوں مؤثر انداز وچ نشانہ بنایا۔ شدید فائرنگ دے تبادلے توں بعد بھارتی سرپرستی وچ سرگرم 6 خوارج ہلاک کر دِتے گئے۔
اک ہور جھڑپ ہنگو وچ ہوئی، جتھے سکیورٹی فورسز نے ہور 4 خوارج نوں ہلاک کر دِتا۔ کارروائیاں دوران ہلاک خوارج دے قبضے وچوں اسلحہ تے گولہ بارود وی برآمد کیتا گیا۔
بیان دے مطابق 17 ستمبر نوں سکیورٹی فورسز دے قافلے نوں دیسی ساختہ بم دے ذریعے نشانہ بنایا گیا، جس دے نتیجے وچ 6 جوان شہید ہو گئے۔ سکیورٹی ذرائع دے مطابق علاقے وچ ممکنہ طور اُتے موجود ہور خوارج دے خاتمے لئی کلیئرنس تے سرچ آپریشن جاری نیں۔
شہید ہون والے بہادر جواناں دیاں قربانیاں ملک دے دفاع تے عوام دے تحفظ لئی سکیورٹی فورسز دے غیر متزلزل عزم نوں ہور مضبوط کردیاں نیں۔
اِدھر سکیورٹی فورسز نے خفیہ اطلاعات دی بنیاد اُتے بلوچستان دے ضلع آواران دے علاقے بدرنگ وچ آپریشن ردالفتنہ 3 شروع کیتا تے ایس دوران مؤثر کارروائی دے نتیجے وچ 3 دہشتگرد ہلاک ہو گئے۔ ہلاک دہشتگرداں دے قبضے وچوں خودکار ہتھیاراں، دھماکا خیز مواد تے گولہ بارود سمیت وڈی مقدار وچ تخریبی مواد برآمد کر لیا گیا، جیہڑا علاقے وچ تخریب کاری دی وڈی کارروائی لئی استعمال ہونا سی۔
سکیورٹی ذرائع دا کہنا اے کہ بلوچستان وچ مسلسل، مؤثر تے ٹارگٹڈ آپریشنز دے نتیجے وچ ایس دہشتگرد نیٹ ورک دی کمر توڑ دِتی گئی اے۔ دہشتگرداں تے انہاں دے سہولت کاراں دے مکمل خاتمے تک کارروائیاں بلاتعطل جاری رہن گیاں۔
