دانش یونیورسٹی نوجواناں نوں عالمی معیار دی تعلیم دیوے گی: وزیراعظم

داخلے لئی پورے پاکستان توں باصلاحیت طلبہ دا انتخاب میرٹ اُتے کیتا جاوے گا

اسلام آباد وزیراعظم شہباز شریف نے آکھیا اے کہ پاکستان دے ہونہار تے مستحق طلبہ نوں میرٹ اُتے معیاری تے جدید تعلیم دی فراہمی حکومت دی پہلی ترجیح اے۔ دانش یونیورسٹی پاکستان دے باصلاحیت تے مستحق نوجواناں نوں عالمی معیار دی تعلیم دے موقعے فراہم کرے گی۔

ایناں خیالات دا اظہار اوہناں نے دانش یونیورسٹی دے حوالے نال جائزہ اجلاس دی صدارت کردیاں کیتا۔ وزیراعظم نے مزید آکھیا کہ دانش یونیورسٹی بہترین تعلیمی، تحقیقی تے جدید تکنیکی سہولتاں دی بدولت ملک بھر تے پورے خطے وچ ٹیکنالوجی دے شعبے وچ اک مرکزِ امتیاز دے طور اُتے اُبھرے گی۔ دانش یونیورسٹی وچ داخلے لئی پورے پاکستان توں باصلاحیت طلبہ دا انتخاب میرٹ اُتے کیتا جاوے گا۔

اجلاس نوں دانش یونیورسٹی دے قیام نال متعلق وزیراعظم دیاں مختلف ہدایتاں اُتے پیشرفت بارے آگاہ کیتا گیا۔ بریفنگ وچ دَسیا گیا کہ دانش یونیورسٹی وچ مختلف فیکلٹی آسامیوں لئی ہُن تک 185 درخواستاں موصول ہو چکیاں نیں۔ دانش یونیورسٹی لئی بہترین تے باصلاحیت فیکلٹی دے انتخاب دا عمل جاری اے۔

ایف ایس سی تے اے لیول دے دوجے سال وچ زیرِ تعلیم طلبہ لئی دانش یونیورسٹی دے ورچوئل سکول واسطے ٹیلنٹ ہنٹ دا عمل شروع کر دِتا گیا اے۔ بریفنگ وچ دَسیا گیا کہ ورچوئل سکول وچ کامیاب طلبہ لئی پنج مہینیاں دے دورانیے دیاں سو فیصد مفت کلاسز دا انعقاد کیتا جاوے گا۔ دانش یونیورسٹی ورچوئل کلاسز لئی ٹیسٹ 40 توں ودھ شہراں وچ 24 اکتوبر 2026 نوں منعقد کیتا جاوے گا۔

دانش یونیورسٹی دی عمارت اگلے سال تک مکمل ہو جاوے گی۔ دانش یونیورسٹی وچ باقاعدہ تدریسی سرگرمیاں دا آغاز 20 ستمبر 2027 نوں ہووے گا۔

بریفنگ وچ دَسیا گیا کہ دانش یونیورسٹی وچ ابتدائی مرحلے وچ بائیو انجینئرنگ، الیکٹریکل انجینئرنگ، مصنوعی ذہانت، کمپیوٹر سائنس تے ٹیکنالوجی و سماجیات اُتے مبنی جدید تعلیمی پروگرام شروع کیتے جان گے۔

طلبہ نوں یونیورسٹی وچ باقاعدہ تعلیم شروع کرن لئی ضروری تیاری تے معاونت فراہم کرن واسطے برج پروگرام وی شروع کیتا جاوے گا۔ دانش یونیورسٹی دا برج پروگرام 10 اگست توں 14 ستمبر 2027 تک جاری رہے گا۔