قائمہ کمیٹی دا BISP دی کارکردگی اُتے عدم اطمینان، تشہیری ریکارڈ طلب
- 16 سالاں وچ عوام نوں پروگرام دیاں کامیابیاں بارے مؤثر طور اُتے آگاہ نہ کرن اُتے تنقید، بریفنگ دا مواد دیر نال فراہم کیتے جان اُتے کمیٹی برہم، سیکرٹری نوں سخت ہدایت
- اسلام آباد (سٹاف رپورٹر) قومی اسمبلی دی قائمہ کمیٹی برائے انسدادِ غربت تے سماجی تحفظ نے بے نظیر انکم سپورٹ پروگرام دی کارکردگی تے عوامی آگاہی دے حوالے نال عدم اطمینان دا اظہار کردیاں نجی بینکاں دے ایجنٹاں ولوں پیش آن والے مسئلیاں اُتے ادارے دا مؤقف مؤثر انداز وچ عوام تک نہ پہنچاؤن اُتے سوال چک دِتے۔
- کمیٹی نے وزارت نوں آئندہ اجلاساں لئی بریفنگ دا مواد بروقت فراہم کرن تے گزشتہ دو سالاں دی تشہیری مہم دے خرچیاں دیاں مکمل تفصیلاں اک ہفتے وچ پیش کرن دی ہدایت کر دِتی۔ قائمہ کمیٹی دا اجلاس چیئرمین میر غلام علی تالپور دی زیرِ صدارت پارلیمنٹ ہاؤس وچ ہویا۔
- اجلاس دے آغاز اُتے وزارتِ غربت وچ کمی تے سماجی تحفظ ولوں بریفنگ دا مواد دیر نال فراہم کیتے جان اُتے کمیٹی نے برہمی دا اظہار کیتا تے سیکرٹری وزارت نوں ہدایت کیتی کہ آئندہ ایس قسم دی غفلت دوبارہ نہ ہووے۔
- اجلاس وچ بے نظیر انکم سپورٹ پروگرام دی چیئرپرسن نے کمیٹی نوں دَسیا کہ ادارہ اک بین الاقوامی فلاحی ادارے دے تعاون نال عوام نوں آگاہ کر رہیا اے کہ پارٹنر بینکاں دے ادائیگی مراکز دے ایجنٹاں دیاں سرگرمیاں وچ بی آئی ایس پی دا براہِ راست کردار نہیں، بلکہ ایہہ متعلقہ بینکاں دیاں معاہدہ جاتی ذمہ داریاں نیں۔
- کمیٹی نے ایس گل اُتے تشویش دا اظہار کیتا کہ 16 سال گزرن دے باوجود بی آئی ایس پی عوام نوں اپنی کامیابیاں تے ذمہ واریاں بارے مؤثر طور اُتے آگاہ نہیں کر سکیا۔
- کمیٹی نے 90 لاکھ ڈیجیٹل والیٹس کھولن تے مستحقین وچ مفت سمّاں تقسیم کرن دے اقدام نوں سراہیا۔ کمیٹی نے ایجنڈے دے باقی نکات اُتے بحث آئندہ اجلاس تک مؤخر کر دِتی۔
