صوبیاں وچ نویں انتظامی یونٹاں دی تشکیل وقت دی لوڑ اے: علیم خان
موجودہ صوبائی نظام عوام نوں مطلوبہ سطح اُتے خدمات دی فراہمی وچ ناکام رہیا، وفاقی وزیر مواصلات نال سردار یوسف دی ملاقات، ہزارہ صوبے دی حمایت اُتے شکریہ ادا کیتا۔
اسلام آباد وفاقی وزیر مواصلات عبدالعلیم خان نال وفاقی وزیر مذہبی امور سردار محمد یوسف نے ملاقات کیتی، جس وچ نویں صوبیاں تے انتظامی یونٹاں دی تشکیل سمیت مختلف اہم معاملیاں اُتے تبادلہ خیال کیتا گیا۔ سردار محمد یوسف نے ہزارہ صوبے دی تشکیل دے حوالے نال حمایت اُتے عبدالعلیم خان دا شکریہ ادا کیتا۔
علیم خان نے آکھیا کہ نویں صوبیاں دا معاملہ صوبیاں دی تقسیم نہیں بلکہ انہاں دی بہتر تنظیم دا اے۔ چاراں صوبیاں وچ نویں انتظامی یونٹاں دی تشکیل وقت دی لوڑ اے تاں جو عوام نوں بنیادی سہولتاں انہاں دی دہلیز اُتے فراہم کیتیاں جا سکّن۔
عبدالعلیم خان نے آکھیا کہ موجودہ صوبائی نظام عوام نوں مطلوبہ سطح اُتے خدمات دی فراہمی وچ ناکام رہیا اے۔ دنیا تیزی نال اگے ودھ رہی اے، جدوں کہ اسیں کئی دہائیاں پرانے انتظامی ڈھانچے نال چمٹے ہوئے آں۔ ایس لئی وقت دیاں لوڑاں دے مطابق اصلاحات تے بہتر انتظامی نظام اُتے سنجیدگی نال غور ضروری اے۔
وفاقی وزیر عبدالعلیم خان نے آکھیا کہ نویں صوبیاں تے انتظامی یونٹاں دے معاملے اُتے صحت مند تے سنجیدہ گفتگو وچ کوئی حرج نہیں۔ ساریاں سیاسی قوتاں نوں ایس اہم قومی مسئلے اُتے گل بات دے ذریعے اگے ودھنا تے کسے وی قسم دے ڈیڈ لاک توں بچنا ہووے گا۔
ملاقات وچ وفاقی وزیراں نے ایس امید دا اظہار کیتا کہ نویں صوبیاں تے انتظامی یونٹاں دے حوالے نال جاری مثبت بحث مستقبل وچ کسے قابلِ عمل تے مثبت پیش رفت دا باعث بنے گی۔
