تشدد، انتشار دا رستہ اپنان والے ملکی ترقی تے خوشحالی دے دشمن: مریم نواز
سرحداں دی حفاظت اُتے مامور افواج دے جذبے نوں سلام، دہشتگرد ہلاک کرن اُتے فورسز نوں خراجِ تحسین، خدا کرے پاکستان سمیت دنیا بھر وچ ہر پاسے، ہر ویلے امن تے خوشحالی ہووے، وزیراعلیٰ دا عالمی یومِ امن اُتے پیغام
لاہور وزیراعلیٰ پنجاب مریم نواز شریف نے آکھیا اے کہ تشدد تے انتشار دا رستہ اپنان والے پاک سرزمین دی ترقی تے خوشحالی دے دشمن نیں۔ امن دے عالمی دن دے حوالے نال اپنے پیغام وچ وزیراعلیٰ مریم نواز شریف نے قیامِ امن لئی سرحداں دی حفاظت اُتے مامور افواجِ پاکستان دے افسراں تے اہلکاراں دے جذبے تے قربانیاں نوں سلام پیش کیتا۔
وزیراعلیٰ مریم نواز شریف نے صوبے بھر وچ امن و امان لئی ہر ویلے سرگرمِ عمل پولیس تے ہور سکیورٹی فورسز دے جواناں نوں وی سراہیا۔ وزیراعلیٰ مریم نواز شریف نے اپنے بیان وچ امن دی خاطر جان قربان کرن والے شہیداں نوں خراجِ عقیدت تے غازیاں نوں سلامِ عقیدت پیش کیتا۔
عالمی یومِ امن اُتے اپنے پیغام وچ وزیراعلیٰ مریم نواز شریف نے مزید آکھیا کہ پاکستان دی تعمیر تے ترقی لئی پائیدار امن ناگزیر اے۔ امن ترقی تے خوشحالی دی بنیادی ضرورت اے۔ تشدد تے انتشار دا رستہ اپنان والے پاک سرزمین دی ترقی تے خوشحالی دے دشمن نیں۔
انہاں مزید آکھیا کہ امن صرف جنگ ختم ہون دا ناں نہیں، ایہ انصاف، محبت تے احترام دے نال زندگی گزارن دا دوجا ناں اے۔ وزیراعلیٰ مریم نواز شریف نے اللہ تعالیٰ دے حضور دعا کیتی کہ خدا کرے پاکستان سمیت دنیا بھر وچ ہر پاسے، ہر ویلے امن تے خوشحالی ہووے۔
دریں اثنا وزیراعلیٰ پنجاب مریم نواز شریف نے ہنگو تے ہور علاقیاں وچ دہشتگرد ہلاک کرن اُتے سکیورٹی فورسز نوں خراجِ تحسین پیش کیتا۔ وزیراعلیٰ نے دہشتگرداں دے خلاف کارروائیاں وچ جامِ شہادت نوش کرن والے کیپٹن ابوذر فاروق، لیفٹیننٹ شیراز بابر تے 4 جواناں نوں وی خراجِ عقیدت پیش کیتا۔ مریم نواز نے شہیداں دے اہلِ خانہ نال ہمدردی تے تعزیت دا اظہار کیتا۔
وزیراعلیٰ نے آکھیا کہ شہید افسراں تے جواناں نے دفاعِ وطن لئی بے مثال جرات تے شجاعت دا مظاہرہ کیتا۔
علاوہ ازیں وزیراعلیٰ پنجاب نے مسجد الحرام دے مؤذن شیخ ابراہیم المدنی دے انتقال اُتے دلی افسوس دا اظہار کیتا اے۔ وزیراعلیٰ نے اہلِ مکہ تے ہور سوگوار خاندان نال ہمدردی تے تعزیت وی کیتی۔
وزیراعلیٰ پنجاب مریم نواز شریف نے متحدہ عرب امارات دے نائب صدر تے وزیراعظم شیخ محمد بن راشد المکتوم دے بھائی شیخ احمد بن راشد المکتوم دے انتقال اُتے وی اظہارِ افسوس کیتا تے آلِ مکتوم خاندان تے متحدہ عرب امارات دے عوام نال ہمدردی تے دلی تعزیت دا اظہار کیتا اے۔
