نیشنل ڈیفنس یونیورسٹی دے وفد دی چیف جسٹس پاکستان نال ملاقات
جمہوریت تے اختیارات دی ونڈ دا آئینی نظام، آئینی نظم و نسق دے بنیادی اجزا نیں: جسٹس یحییٰ آفریدی دی وفد نال گل بات، عدالتی نظام دی درجہ بندی بارے آگاہ کیتا
اسلام آباد (اے پی پی) چیف جسٹس آف پاکستان جسٹس یحییٰ آفریدی نے آکھیا اے کہ پارلیمانی جمہوریت تے اختیارات دی ونڈ دا آئینی نظام، قانون دی حکمرانی تے آئینی نظم و نسق دے بنیادی اجزا نیں، جدوں کہ مقننہ، انتظامیہ تے عدلیہ اپنے اپنے دائرہ اختیار وچ آئینی حکمرانی دے فروغ لئی معاون کردار ادا کردے نیں۔
سپریم کورٹ دے شعبہ تعلقاتِ عامہ ولوں جاری اعلامیے دے مطابق چیف جسٹس نے ایہہ گلّاں نیشنل ڈیفنس یونیورسٹی اسلام آباد دے نیشنل سکیورٹی اینڈ وار کورس 2027 دے 123 رکنی وفد نال سپریم کورٹ وچ ملاقات دوران کیتیاں۔ وفد دی قیادت چیف انسٹرکٹر میجر جنرل محمد شہزاد خان نے کیتی۔ وفد وچ مسلح افواج تے سول سروسز دے افسران، فیکلٹی ارکان، جدوں کہ دوست ملکاں دے 27 شرکا وی شامل سن۔
چیف جسٹس نے وفد نوں عدالتی نظام دی درجہ بندی تے مختلف عدالتاں دے دائرہ اختیار بارے وی آگاہ کیتا۔ چیف جسٹس نے ادارہ جاتی رابطہ کاری تے عدالتی شعبے وچ اصلاحات دا ذکر کردے ہوئے آکھیا کہ نیشنل جوڈیشل پالیسی میکنگ کمیٹی اعلیٰ ترین عدالتی پالیسی فورم اے۔
انہاں عدالتی انفراسٹرکچر دی بہتری، عوامی سہولت تے انصاف تک رسائی لئی کیتے جان والے اقدامات بارے وی آگاہ کیتا، جنہاں وچ بلاتعطل بجلی دی فراہمی، ای لائبریریز، صاف پین والے پانی تے عدالتاں نال رجوع کرن والیاں خواتین لئی بہتر سہولتاں شامل نیں۔
انہاں صنفی حساسیت اُتے مبنی انصاف دے اقدام 2026-27 اُتے وی روشنی پاندے ہوئے خواتین لئی قائم کیتے جان والے سہولت مراکزاں دی اہمیت اُجاگر کیتی۔
چیف جسٹس نے وفد دے ارکان نال سوال جواب دی نشست وی کیتی، جس وچ آئینی حکمرانی، عدالتی اداریاں تے جاری اصلاحات نال متعلق امور اُتے تبادلہ خیال کیتا گیا۔
بعد وچ وفد نے سپریم کورٹ میوزیم تے عدالت نال منسلک مصالحتی مرکز دا دورہ کیتا۔ ایس موقع اُتے چیف جسٹس پاکستان تے وفد دے سربراہ وچکار یادگاری تحفیاں دا تبادلہ وی ہویا۔
