نورین، عظمیٰ خان وی جیل منتقل، نظر بندی ہائیکورٹ وچ چیلنج، اج سماعت
عمران خان دیاں بھیناں تے بھانجیاں نوں علیمہ خان دی رہائشگاہ توں حراست وچ لیا گیا، بکتر بند گاڑی اُتے منتقل، رات گئے بچے تے اہلِ خانہ رہا، گولی چلائی تاں فیر دوجے پاسے توں وی گولی چلے گی: وزیراعلیٰ خیبر پختونخوا، ظالمانہ اقدامات دا حساب دینا پئے گا: شفیع اللہ جان
پشاور، لاہور بانی پی ٹی آئی عمران خان دی بھین علیمہ دے بعد عظمیٰ خان تے نورین نیازی نوں وی نظر بند کر دِتا گیا، دوجے پاسے تیناں بھیناں دی نظر بندی نوں لاہور ہائیکورٹ وچ چیلنج کر دِتا گیا اے، درخواست سماعت لئی منظور کر لئی گئی اے۔ عظمیٰ خان تے نورین نیازی نوں ڈپٹی کمشنر لاہور دے احکاماں اُتے تھری ایم پی او دے تحت پولیس دی سفارش اُتے 30 دن لئی نظر بند کیتا گیا اے۔
ذرائع نے دَسیا کہ پولیس نے علیمہ خان دی رہائشگاہ توں انہاں دیاں بھیناں تے بھانجیاں نوں حراست وچ لیا تے انہاں نوں بکتر بند گاڑی دے ذریعے منتقل کیتا گیا۔ رات گئے بچیاں تے ہور اہلِ خانہ نوں رہا کر دِتا گیا، جدوں کہ دونے بھیناں نوں 30 روز لئی نقصِ امن دے خطرے دے پیشِ نظر جیل بھجوا دِتا گیا۔
ادھر اسلام آباد دے ریڈ زون توں پاکستان تحریک انصاف دے 6 ارکانِ پارلیمنٹ نوں گرفتار کر لیا گیا۔ انہاں وچ عادل بازئی، سینیٹر سیف اللہ نیازی، ثناء اللہ مستی خیل، میاں احسن جمال، داوڑ خان تے محمد غوث شامل نیں۔ ذرائع دے مطابق زیرِ حراست پی ٹی آئی ارکانِ اسمبلی نوں تھری ایم پی او دے تحت جہلم جیل بھجوا دِتا گیا اے۔
آزاد کشمیر وچ وی پی ٹی آئی خلاف کریک ڈاؤن شروع کر دِتا گیا تے سابق اپوزیشن لیڈر خواجہ فاروق، متعدد پارٹی رہنماواں تے کارکنان نوں گرفتار کر لیا گیا۔ پولیس نے مظفرآباد وچ خواجہ فاروق دی رہائشگاہ اُتے چھاپہ مار کے انہاں نوں حراست وچ لیا۔ پی ٹی آئی نال وابستہ 12 ہور افراد نوں وی گرفتار کیتا گیا۔ پی ٹی آئی دے مطابق کارروائی اوس ویلے کیتی گئی جدوں اسلام آباد مارچ دی کال دے حوالے نال مشاورتی اجلاس جاری سی۔
دوجے پاسے لاہور ہائیکورٹ وچ عمران خان دیاں بھیناں دی نظر بندی دے احکامات نوں چیلنج کر دِتا گیا اے۔ درخواست وچ پنجاب حکومت، ہوم ڈیپارٹمنٹ، ڈی سی لاہور سمیت ہوراں نوں فریق بنایا گیا اے۔ علیمہ خانم دے پتر شاہ زیر تے عظمیٰ خانم دی دھی سکینہ نے وکیل رانا مدثر عمر دے ذریعے درخواست وچ علیمہ، عظمیٰ تے نورین دی نظر بندی نوں چیلنج کیتا اے۔
درخواست وچ مؤقف اختیار کیتا گیا اے کہ ڈی سی لاہور نے غیر قانونی طور اُتے نظر بندی دے احکامات جاری کیتے، تینوں بھیناں کسے غیر قانونی سرگرمی وچ ملوث نہیں، تے تھری ایم پی او دے طریقہ کار دے مطابق احکامات جاری نہیں کیتے گئے۔ درخواست وچ نشاندہی کیتی گئی کہ گرفتاری توں بعد علیمہ خانم دی نظر بندی دے احکامات جاری کیتے گئے۔
درخواست وچ استدعا کیتی گئی اے کہ ڈی سی دے نظر بندی دے احکامات نوں کالعدم قرار دِتا جاوے۔ لاہور ہائیکورٹ نے عمران خان دیاں تین بھیناں دی نظر بندی خلاف درخواستاں سماعت لئی مقرر کر لئیاں نیں۔ جسٹس عبہر گل خان اج سویرے 9 وجے درخواستاں اُتے سماعت کرن گے۔
ادھر وزیراعلیٰ خیبر پختونخوا سہیل آفریدی نے پریس کانفرنس کردے ہوئے آکھیا اے کہ اسی جمہوری لوک آں تے اسی سارے آئینی، قانونی تے جمہوری راستے اپنائے نیں، پر اتھے سپریم کورٹ دے احکاماں نوں ہوا وچ اڑا دِتا جاندا اے۔ انہاں آکھیا کہ وزیراعلیٰ بنن توں بعد کوئی وڈا احتجاج نہیں کیتا، پر ساڈی گل نہیں سنی جا رہی۔ آخری راستہ احتجاج دا ہوندا اے تے اسی پُرامن طریقے نال احتجاج کیتا۔
سہیل آفریدی نے آکھیا کہ میرا آئین، میرا قانون مینوں پُرامن احتجاج دی اجازت دیندا اے، پر جے ایہ پُرامن احتجاج دی اجازت نہیں دینا چاہندے تاں فیر آئین وچوں ایس دی شق ہی کڈ دیو۔ انہاں آکھیا کہ 27 ستمبر نوں اسی پُرامن طور اُتے ضرور نکلواں گے۔ ایہ عمران خان دیاں بھیناں، رہنماواں تے ارکانِ اسمبلی نوں گرفتار کرکے تحریک نوں ناکام کرن دی کوشش اے، جیہڑی ناکام ہووے گی۔
انہاں آکھیا کہ احتجاج ساڈا حق اے، 27 ستمبر نوں پوری قوت نال نکلواں گے۔ اینی وڈی تعداد وچ لوک باہر آؤن گے جس دا مخالفین تصور وی نہیں کر سکدے۔ سانوں کسے قسم دا ڈر نہیں۔ 25 ستمبر نوں احتجاج دا سار ا پلان سامنے لے آواں گے۔ ایہ ٹیسٹ میچ اے تے ان شاء اللہ اسی ہی جیتاں گے۔ ساڈا تصادم دا کوئی ارادہ نہیں، اسی پُرامن تے جمہوری طریقے نال انصاف لئی آواز چک رہے آں۔
انہاں آکھیا کہ جے گولی چلائی گئی تاں فیر دوجے پاسے توں وی گولی چلے گی۔ موجودہ صورتحال ملک نوں خانہ جنگی ول لے جان دی کوشش اے۔
وزیر داخلہ دی پریس کانفرنس دی مذمت کردے ہوئے انہاں آکھیا کہ اسی کوئی دہشتگرد نہیں، بندوق دا مقابلہ بندوق نال نہیں کر رہے بلکہ اپنے آئینی تے جمہوری حق لئی آواز چک رہے آں۔
پی ٹی آئی رہنما شفیع جان نے آکھیا کہ رات دے ہنیرے وچ عمران خان دیاں بھیناں نوں بچیاں سمیت گرفتار کرنا شرمناک تے قابلِ مذمت اے۔ ایکس اُتے بیان وچ انہاں آکھیا کہ چادر تے چار دیواری دا تقدس پامال کرنا تے گھراں وچ توڑ پھوڑ پنجاب پولیس دا وطیرہ بن چکیا اے۔ عمران خان دے خاندان نوں آخر کِہڑے جرم دی سزا دِتی جا رہی اے؟ پنجاب دے حکمرانو، سن لو! انہاں ظالمانہ اقدامات دا حساب دینا پئے گا۔
پی ٹی آئی رہنما شاہد خٹک نے آکھیا کہ 27 ستمبر نوں تاں اسی آواں گے تے پوری طاقت نال آواں گے، پر جس طرح ارکانِ اسمبلی نوں اغوا کیتا جا رہیا اے، اوہ بہت تشویشناک اے۔ ایکس اُتے بیان وچ انہاں قومی اسمبلی دے اپوزیشن لیڈر تے سینیٹ دے اپوزیشن لیڈر توں درخواست کیتی کہ فوری طور اُتے اجلاس بلاؤن تے ساریاں اسمبلیاں تے سینیٹ توں استعفیاں اُتے غور کیتا جاوے۔ جدوں کسے رکنِ پارلیمنٹ نوں تحفظ ہی نہیں تاں اسی انہاں اسمبلیاں وچ کیوں بیٹھے آں؟
اسد قیصر نے آکھیا کہ فارم 47 دی جعلی حکومت نے سیاسی انتقام دیاں ساریاں حدّاں پار کر دِتیاں نیں۔ عمران خان دیاں بھیناں دیاں گرفتاریاں حکومت دی بوکھلاہٹ دا ثبوت نیں۔
