مسلح افواج دہشت گردی دے خاتمے تے پائیدار امن لئی پُرعزم: فیلڈ مارشل
شہیداں دیاں قربانیاں نوں فراموش نہیں کراں گے، مسلسل چوکس رہو، اعلیٰ ترین آپریشنل تیاری برقرار رکھو، کور ہیڈکوارٹرز پشاور وچ خطاب۔ چیف آف ڈیفنس فورسز عاصم منیر نال فرانسیسی سیکرٹری جنرل دفاع دی ملاقات، دفاعی تعاون نوں وسعت دین دا عزم۔
راولپنڈی فیلڈ مارشل سید عاصم منیر نے کور ہیڈکوارٹر پشاور دا دورہ کیتا تے آکھیا کہ مسلح افواج قوم دی غیر متزلزل حمایت نال دہشت گردی دے خاتمے تے ملک بھر وچ پائیدار امن تے استحکام قائم کرن لئی پُرعزم نیں، شہیداں دیاں قربانیاں نوں فراموش نہیں کیتا جائے گا۔
پاک فوج دے محکمہ تعلقات عامہ (آئی ایس پی آر) دے مطابق چیف آف ڈیفنس فورسز فیلڈ مارشل سید عاصم منیر نے کور ہیڈکوارٹر پشاور دا دورہ کیتا۔ دورے دے موقع اُتے آرمی چیف نوں خیبر پختونخوا دی موجودہ سکیورٹی صورتحال بارے بریفنگ دِتی گئی۔ فیلڈ مارشل نوں صوبے وچ جاری انسدادِ دہشت گردی آپریشنز، سرحدی انتظامات تے تعینات فارمیشنز دیاں آپریشنل تیاریواں بارے وی آگاہ کیتا گیا۔
فیلڈ مارشل سید عاصم منیر نے فارمیشنز نوں مسلسل چوکس رہن تے اعلیٰ ترین آپریشنل تیاری برقرار رکھن دی ہدایت کیتی۔ انہاں افسراں تے جواناں دے بلند حوصلے، تیاری تے پیشہ ورانہ صلاحیتاں نوں سراہیا، جدوں کہ عوام دے تحفظ تے سلامتی لئی انہاں دی ثابت قدمی نوں خراجِ تحسین پیش کیتا۔
آرمی چیف نے یادگارِ شہدا اُتے پھلاں دی چادر چڑھائی تے فاتحہ خوانی کیتی۔ فیلڈ مارشل نے مادرِ وطن دے دفاع تے دہشت گردی دے خلاف جنگ وچ جاناں دا نذرانہ پیش کرن والے شہیداں نوں خراجِ عقیدت پیش کیتا۔
پشاور پہنچن اُتے کور کمانڈر پشاور نے فیلڈ مارشل دا استقبال کیتا۔
دریں اثنا فرانس دے سیکرٹری جنرل برائے دفاع تے قومی سلامتی نیکولاس روش نے فرانسیسی سفیر ژاں نوئل پواریے دے نال فیلڈ مارشل سید عاصم منیر نال جنرل ہیڈکوارٹرز راولپنڈی وچ ملاقات کیتی۔
ایس دوران باہمی دلچسپی دے امور، علاقائی سلامتی دی صورتحال تے دفاع تے سکیورٹی دے شعبیاں وچ پاکستان تے فرانس دے درمیان دوطرفہ تعاون اُتے تفصیلی تبادلہ خیال کیتا گیا۔
فیلڈ مارشل سید عاصم منیر نے پاکستان تے فرانس دے درمیان دوطرفہ تعلقات نوں ہور مضبوط بناؤن تے دفاع تے سلامتی دے شعبیاں وچ تعاون نوں وسعت دین دے عزم دا اعادہ کیتا۔ فرانسیسی سیکرٹری جنرل نے علاقائی امن تے استحکام دے فروغ لئی پاکستان دیاں کوششاں نوں سراہیا۔
نیکولاس روش نے باہمی دلچسپی دے شعبیاں وچ پاکستان نال تعاون ہور ودھاؤن وچ فرانس دی دلچسپی دا وی اظہار کیتا۔ ملاقات وچ دوناں پاسیاں ولوں باہمی تعاون دے موجودہ دائرہ کار نوں ہور مستحکم کرن تے مشترکہ مفادات نال متعلق شعبیاں وچ روابط ودھاؤن دی اہمیت اُتے وی زور دِتا گیا۔
