کچے وچ امن لئی کم کرن والیاں نوں شاباش: پنجاب وچ غنڈہ گردی تے قبضہ مافیا نہیں چل سکدے: مریم نواز
پولیس باڈی وارن ٹیکنالوجی نال لیس، سیف سٹی دا دائرہ پورے پنجاب تک پھیلا دِتا، سٹریٹ کرائم وچ کمی، احساسِ تحفظ پیدا ہویا، شہیداں تے غازیاں نوں سلام، جوان پُتراں نوں محاذ اُتے بھیجن والے والدین اعلیٰ ترین لوک نیں: وزیراعلیٰ، صوبائی ایپکس کمیٹی اجلاس وچ گفتگو
لاہور (سٹاف رپورٹر) وزیراعلیٰ پنجاب مریم نواز شریف دی زیرِ صدارت صوبائی ایپکس کمیٹی دا اجلاس ہویا، جیہڑے وچ صوبے وچ امن و امان دی مجموعی صورتحال تے سکیورٹی امور اُتے تفصیلی بریفنگ دِتی گئی۔ سکیورٹی اداریاں دے درمیان مؤثر تے منظم اشتراکِ کار اُتے اطمینان دا اظہار کیتا گیا۔
وزیراعلیٰ مریم نواز نے ایس موقع اُتے گل کردیاں آکھیا کہ قوم دہشت گردی دے خلاف جنگ وچ شہید ہون والے شہیداں تے غازیاں نوں سلام پیش کردی اے۔ جوان پُتراں نوں محاذ اُتے بھیجن والے والدین ساڈے توں بہتر تے اعلیٰ ترین لوک نیں۔
اُنہاں آکھیا کہ پنجاب وچ سارے ادارے باہمی اشتراکِ کار دے نال اگے ودھ رہے نیں۔ پیفٹاک دے ذریعے بروقت معلومات دا تبادلہ ممکن ہو رہیا اے۔ اک ٹیم بن کے اکّو سمت وچ کم کرن نال کامیابی ملدی اے۔ پاک فوج تے سارے اداریاں دا بھرپور تعاون حاصل اے۔ امن و امان لئی ذاتی مفاداں توں بالاتر ہو کے کم کرنا پیندا اے۔
وزیراعلیٰ نے آکھیا کہ سٹریٹ کرائم وچ کمی نال عوام وچ احساسِ تحفظ پیدا ہویا اے۔ پنجاب وچ غنڈہ گردی تے قبضہ مافیا نہیں چل سکدے، پنجاب بھر وچ مافیاواں لئی کوئی تھاں نہیں ہووے گی۔
اُنہاں دَسیا کہ کرپشن وچ ملوث ہون دی وجہ نال پولیس دے 718 ملازماں نوں نوکری توں کڈھ دِتا گیا اے۔
وزیراعلیٰ نے ہور آکھیا کہ کچے دے علاقے وچ امن و امان لئی کم کرن والے سارے اداریاں نوں سلام تے شاباش دیندی آں۔ کچے دے علاقے وچ صحت، تعلیم تے امن و امان لئی 30 ارب روپے توں ودھ دا ترقیاتی پیکیج دِتا جا رہیا اے۔
کچے دے علاقے وچ پہلی واری وڈے کرکٹ ٹورنامنٹ دا انعقاد تے عوام تے حکام دی شرکت خوش آئند اے۔ مجموعی طور اُتے پنجاب وچ امن و امان دی صورتحال حوصلہ افزا اے تے پنجاب وچ جرائم دا گراف لگاتار تھلے آ رہیا اے۔
پولیس نوں امن و امان لئی ٹیکنالوجی سمیت سارے ضروری وسائل فراہم کیتے جا رہے نیں۔ عوام دی سہولت لئی پولیس اہلکاراں نوں باڈی وارن ٹیکنالوجی نال لیس کیتا جا رہیا اے۔ سیف سٹی دا دائرہ کار پورے پنجاب تک پھیلا دِتا گیا اے۔
وزیراعلیٰ نے آکھیا کہ پنجاب تے پنجاب دے عوام دی طرفوں مسلح افواج نوں خراجِ تحسین پیش کردے آں۔ فیلڈ مارشل دی قیادت تے شاندار لیڈرشپ قابلِ تحسین اے۔
وزیراعلیٰ نے آکھیا کہ سکیورٹی دے معاملے وچ کوئی گیپ نہیں آنا چاہیدا۔ مختلف چیلنجز دے باوجود عوام دی حفاظت لئی ہر ممکن تے ضروری اقدامات کیتے جا رہے نیں۔
وزیراعلیٰ نے دَسیا کہ خطے دی صورتحال دے پیشِ نظر عوام نوں مہنگائی تے معاشی مشکلات توں بچاؤن اُتے وی توجہ مرکوز اے۔
اجلاس وچ پیفٹاک وچ آرٹیفیشل انٹیلی جنس ہب دا قیام اداریاں دے درمیان بروقت معلومات دے تبادلے لئی اہم قدم قرار دِتا گیا۔ اجلاس وچ آپریشن وچ شہید کیپٹن ابوذر فاروق، لیفٹیننٹ شیراز بابر تے ہور شہیداں نوں خراجِ عقیدت پیش کیتا گیا۔ شہیداں دے ایصالِ ثواب لئی فاتحہ خوانی کیتی گئی تے لواحقین لئی صبرِ جمیل دی دعا کیتی گئی۔
کمانڈر لاہور کور نے اداریاں دی کارکردگی نوں سراہیا تے تسلی بخش قرار دِتا۔ بریفنگ وچ دَسیا گیا کہ کچے دے علاقے وچ سوشل انفراسٹرکچر دے قیام لئی 93 منصوبے شروع کیتے جا رہے نیں۔ سمارٹ پولیس سٹیشنز تے پولیس چیک پوسٹس قائم کیتیاں جان گیاں۔
کچے وچ 62 کروڑ روپے دی لاگت نال سٹیل برج تعمیر کیتا جائے گا۔ عوام لئی روزگار دے مواقع پیدا کرن واسطے سکل ڈویلپمنٹ منصوبے شروع کیتے جا رہے نیں۔ پنجاب وچ غیر قانونی طور اُتے مقیم غیر ملکی باشندیاں دے اخراج نوں یقینی بنایا جا رہیا اے۔
