جیل جان والے دی کون سُندا اے؟ وڈے وڈے لوک شکایتاں کر رہے نیں: سپریم کورٹ
“ہُن وڈے دی وی کوئی نہیں سُندا تاں ایس دی کس نے سُننی اے؟” جسٹس ملک شہزاد دے ریمارکس
بیوی دے قاتل دی اپیل وچ ریمارکس، حق مہر وچ طے شدہ جائیداد بیوی نوں منتقل نہ ہو سکے تاں شوہر بری الذمہ نہیں، قیمت اہلیہ نوں ادا کرنی ہووے گی: تفصیلی فیصلہ جاری
اسلام آباد سپریم کورٹ دے جسٹس ملک شہزاد احمد خان نے اہلیہ نوں قتل کرن والے عمر قید دے مجرم دی اپیل دی سماعت دوران ریمارکس دِتے کہ گھر دے اندر ہون والے قتل وچ گواہ کتھوں آون گے۔
پراسیکیوٹر نے آکھیا کہ جے ملزم بے قصور سی تاں جیل توں وی درخواست دے سکدا سی۔ جسٹس ملک شہزاد احمد خان نے ریمارکس دِتے کہ جدوں کوئی جیل چلا جائے تاں فیر کون سُندا اے؟ وڈے وڈے لوک جیل توں شکایتاں کر رہے نیں، ہُن وڈے دی وی کوئی نہیں سُندا تاں ایس دی کس نے سُننی اے؟
جسٹس شکیل احمد نے آکھیا کہ گھریلو ناچاقی دے کیڑے ثبوت ہُندے نیں؟ گھریلو ناچاقی دے تقریباً 90 فیصد مقدمات رپورٹ ہی نہیں ہُندے۔ تشدد دے واقعات وچ پہلے دی نسبت کجھ کمی آئی اے۔ عدالت نے ملزم دے وکیل نوں ہور تیاری دی ہدایت کردیاں سماعت ملتوی کر دِتی۔
علاوہ ازیں سپریم کورٹ نے قرار دِتا اے کہ جے زیرِ حراست ملزم دی بیماری ایسی ہووے جیہدا جیل وچ مناسب علاج ممکن نہ ہووے تے اوہنوں خصوصی طبی علاج تے نگرانی دی لوڑ ہووے تاں مسلسل حراست اوہدی صحت تے زندگی لئی خطرناک ثابت ہو سکدی اے۔ ایسی صورتحال وچ طبی بنیاداں اُتے بعد از گرفتاری ضمانت دِتی جا سکدی اے۔
جسٹس شاہد وحید دی سربراہی وچ تین رکنی بینچ نے ملزم دیاں طبی بنیاداں اُتے ضمانت دیاں درخواستاں منظور کردیاں بعد از گرفتاری ضمانت دے دِتی۔
تفصیلی فیصلے وچ عدالت نے قرار دِتا کہ سینٹرل جیل راولپنڈی دے میڈیکل آفیسر دیاں رپورٹس توں ظاہر ہُندا اے کہ ملزم سنگین بیماریوں وچ مبتلا اے تے اوہنوں جیل ہسپتال وچ مطلوبہ خصوصی علاج میسر نہیں۔ ملزم دیاں بیماریوں لئی خصوصی علاج تے مسلسل طبی نگرانی دی لوڑ اے، جیہڑی جیل حکام لئی ممکن نہیں۔
سپریم کورٹ نے دونویں درخواستاں نوں اپیلاں وچ تبدیل کردیاں منظور کر لیا تے ذیشان مجید نوں ایف آئی اے کارپوریٹ کرائم سرکل اسلام آباد وچ درج دونویں مقدمات وچ پنج پنج لاکھ روپے دے وکھ وکھ زرِ ضمانت تے اینی ہی مالیت دے مچلکیاں دے عوض ضمانت اُتے رہا کرن دا حکم دے دِتا۔
دریں اثنا سپریم کورٹ نے قرار دِتا کہ بطور حق مہر طے کیتی گئی جائیداد جے بیوی نوں منتقل نہ ہو سکے تاں شوہر حق مہر دی ذمہ داری توں بری نہیں ہووے گا، بلکہ جائیداد دی طے شدہ قیمت بیوی نوں ادا کرنی ہووے گی۔ نکاح نامے وچ قیمت درج نہ ہون دی صورت وچ عدالت مارکیٹ ویلیو دا تعین کر سکدی اے۔
جسٹس شاہد وحید دی سربراہی وچ چار رکنی بینچ نے حق مہر تے نکاح نامے نال متعلق تفصیلی فیصلہ جاری کیتا۔ جسٹس شاہد بلال حسن نے اتفاق کردیاں اضافی نوٹ وی تحریر کیتا۔
جسٹس شاہد بلال حسن نے اضافی نوٹ وچ آکھیا کہ فریقین دی نیت دا تعین بنیادی طور اُتے نکاح نامے توں کیتا جانا چاہیدا اے تے بعد دے زبانی دعویاں نوں نکاح نامے اُتے فوقیت نہیں دِتی جانی چاہیدی۔
نکاح نامے دیاں اہم شرائط فریقین نوں دستخط کرن توں پہلاں پڑھ کے سُنائیاں جانیاں چاہیدیاں نیں تے کوئی وی کالم بلاوجہ خالی نہیں چھڈنا چاہیدا۔
