پاکستان دیاں روس تے عمان نال سانجھی فوجی مشقاں شروع

اسلام آباد (خصوصی نیوز رپورٹر) پاکستان دیاں روس تے عمان نال وکھ وکھ سانجھیاں فوجی مشقاں شروع ہو گیاں۔

پاکستان تے روس دے درمیان سانجھی فوجی مشق دروژبا-IX دا نواں ایڈیشن چراٹ وچ، جدوں کہ پاکستان تے عمان دے درمیان سانجھی فوجی مشق وشق الجبل-II (مانٹین لنکس-II) دے دوجے ایڈیشن دا گزشتہ روز نیشنل کاؤنٹر ٹیررازم سینٹر پبی وچ آغاز ہو گیا۔ دونویں مشقاں دو ہفتیاں تک جاری رہن گیاں۔

آئی ایس پی آر دے مطابق مشقاں وچ پاک فوج دے دستیاں دے علاوہ روسی فوج تے رائل آرمی آف عمان دے دستے وی شریک نیں۔

مشقاں دا مقصد آپریشنل تجربات دا تبادلہ، انسدادِ دہشت گردی دیاں مشقاں تے طریقہ کار نوں ہور مؤثر بنانا، تے شریک افواج دے درمیان باہمی تعاون تے ہم آہنگی نوں فروغ دینا اے۔

سانجھیاں تربیتی سرگرمیاں تے بہترین عملی طریقہ کار دے تبادلے دے ذریعے شریک افواج اپنی جنگی مہارتاں تے حربی صلاحیتاں نوں ہور بہتر بنان گیاں۔

آئی ایس پی آر دا کہنا اے کہ دونویں مشقاں پاکستان، روس تے عمان دیاں افواج دے درمیان دفاعی تعاون نوں ہور مضبوط بناؤن تے سانجھیاں آپریشنل صلاحیتاں وچ اضافے لئی اہم قرار دِتیاں جا رہیاں نیں۔