پاکستان تے مالدیپ دا فضائی رابطیاں تے تجارت دے فروغ اُتے اتفاق
اسلام آباد (اے پی پی، نامہ نگار) پارلیمنٹ ہاؤس اسلام آباد وچ پاکستان تے مالدیپ دے پارلیمانی فرینڈشپ گروپ (پی ایف جی) دا اک اہم اجلاس ہویا، جس وچ جمہوریہ مالدیپ دے پارلیمانی وفد نال دوطرفہ تعلقات دے سارے پہلوواں دا تفصیلی جائزہ لیا گیا۔ اجلاس وچ پاکستان تے مالدیپ دے فضائی رابطیاں تے تجارت دے فروغ اُتے اتفاق کیتا گیا۔
اجلاس دی صدارت کنوینر پی ایف جی شائستہ خان (ایم این اے) نے کانسٹیٹیوشن روم وچ کیتی۔ مذاکرات دا محور دوںواں برادر ممالک دے درمیان پارلیمانی اشتراکِ عمل، معاشی روابط، فضائی رابطے، سیاحت تے عوامی رابطیاں نوں ہور مضبوط بنانا سی۔
مالدیپ دے وفد دا خیرمقدم کردیاں کنوینر شائستہ خان نے آکھیا کہ پاکستان تے مالدیپ دے تعلقات باہمی احترام، سانجھی قدراں تے تاریخی اخوت اُتے مبنی نیں۔ انہاں نے دوطرفہ تعلقات نوں ہور مضبوط بناؤن لئی مسلسل پارلیمانی رابطیاں دی اہمیت اُتے زور دِتا، تاں جو دوںویں ممالک اک دوجے دے قانون سازی تے پارلیمانی تجربیاں توں فائدہ چُک سکن۔
مالدیپ دے پارلیمانی وفد نے قومی اسمبلی سیکرٹریٹ تے پاکستانی اراکین دی شاندار مہمان نوازی اُتے شکریہ ادا کیتا تے پاکستان نال دیرینہ دوستانہ تعلقات دی اہمیت دا اعادہ کیتا۔ مالدیپی وفد نے طبی خدمات، خوراک، تعمیرات، سیاحت تے ماہی گیری (فشنگ) دے شعبیاں وچ پاکستان دی جغرافیائی قربت تے تکنیکی مہارت توں فائدہ اٹھاؤن اُتے زور دِتا۔
دوںواں پاسیاں ولوں پاکستان تے مالدیپ دے درمیان براہِ راست فضائی پروازاں شروع کرن دی فوری ضرورت اُتے خصوصی زور دِتا گیا، تاں جو سیاحت، تجارت، کاروباری تے طبی سفر نال عوام توں عوام دے رابطیاں وچ آسانی پیدا ہو سکے۔
دریں اثنا سپیکر سردار ایاز صادق دی خصوصی دعوت اُتے مالدیپ دے پارلیمانی وفد نے سپیکر پیپلز مجلس مالدیپ عبد الرحیم عبداللہ دی قیادت وچ پارلیمنٹ ہاؤس دا دورہ کیتا۔ سپیکر نے پارلیمنٹ ہاؤس آمد اُتے وفد دا پرتپاک استقبال کیتا۔
وفد نے سپیکر قومی اسمبلی سردار ایاز صادق نال ملاقات کیتی۔ ملاقات وچ دوطرفہ تعلقات، پارلیمانی روابط تے باہمی دلچسپی دے امور اُتے تبادلہ خیال کیتا گیا۔ ملاقات وچ دوںواں ممالک دیاں پارلیماناں دے درمیان رابطیاں نوں ہور فروغ دین تے پارلیمانی تعاون نوں مضبوط بناؤن دے عزم دا اعادہ کیتا گیا۔
ایس موقع اُتے گل کردیاں سپیکر قومی اسمبلی سردار ایاز صادق نے آکھیا کہ پاکستان مالدیپ نال اپنے دیرینہ، دوستانہ تے برادرانہ تعلقات نوں بڑی اہمیت دیندا اے۔ مالدیپ دے پارلیمانی وفد دا دورہ دوںواں ممالک دے قانون ساز اداریاں دے درمیان رابطیاں نوں ہور مضبوط کرن تے باہمی تعاون دے نویں مواقع پیدا کرن وچ اہم پیش رفت ثابت ہووے گا۔
