نواں نصاب منظور، سرکاری سکولاں وچ بہترین تعلیمی ماڈل ویکھنا چاہندی آں: مریم نواز
ر کتاب وچ کیو آر کوڈ سکین کرکے ویڈیو سبق ویکھن دی سہولت، مارچ توں پہلاں کتاباں دی پرنٹنگ، سکولاں وچ جسمانی سزا دے خلاف قانون سازی اُتے اتفاق، آزاد کشمیر دے نویں صدر نوں مبارکباد
لاہور وزیراعلیٰ پنجاب مریم نواز شریف نے سکول ایجوکیشن دے نویں نصاب دی منظوری دے دِتی۔ وزیراعلیٰ دی زیرِ صدارت خصوصی اجلاس وچ انگلش، میتھ، سوشل سٹڈیز، اردو تے ارلی چائلڈ ہُڈ کریکولم دا جائزہ لیا گیا۔
نویں کریکولم دی تشکیل نال کتاباں دا بوجھ 25 فیصد گھٹ تے رٹے دے رجحان وچ کمی آوے گی۔ ہر کتاب وچ کیو آر کوڈ سکین کرکے موضوع نال متعلق ویڈیو سبق وی ویکھیا جا سکے گا۔ وزیراعلیٰ مریم نواز نے کلاس ون توں بارہویں تک اے آئی نصاب وی طلب کر لیا۔ اوہناں مارچ توں پہلاں نصابی کتاباں دی پرنٹنگ مکمل کرن دا حکم دِتا۔
پیکٹا ولوں تشکیل دِتے گئے نویں تعلیمی نصاب دا جائزہ لیا گیا تے باضابطہ منظوری وی دِتی گئی۔ اجلاس وچ سکول ایجوکیشن ڈیپارٹمنٹ دے ذیلی ادارے پیکٹا بارے تفصیلی بریفنگ دِتی گئی۔
اجلاس وچ پنجاب وچ پہلی واری اساتذہ کرام دی نفسیاتی معاونت لئی مینٹل ہیلتھ ٹریننگ شروع کرن دا فیصلہ کیتا گیا۔ طلبہ نوں جسمانی سزا توں روکّن لئی قانون سازی اُتے اتفاق کیتا گیا۔ ہر ضلع وچ وزیٹنگ فیکلٹی سائیکالوجسٹ مقرر کرن دی تجویز دا وی جائزہ لیا گیا۔
وزیراعلیٰ نے طلبہ لئی آن لائن کونسلنگ فراہم کرن دے اقدامات دی ہدایت کیتی، جبکہ جسمانی سزا دی بجائے کلاس روم وچ ڈسپلن کارنر قائم کرن دی تجویز دِتی گئی۔ اجلاس وچ پنجاب بھر وچ ہفتے دا دن ٹیچر ٹریننگ لئی مختص کرن اُتے وی اتفاق ہویا۔
وزیراعلیٰ نے اجلاس وچ گل کردیاں آکھیا کہ پنجاب دے سرکاری سکولاں وچ بہترین ایجوکیشنل ماڈل ویکھنا چاہندی آں۔ اے آئی نصاب دے نال نال لیب بناون اُتے وی توجہ دینی چاہیدی اے۔ وسائل دی کمی نہیں، پر ہُن وسائل دا ضیاع روکنا ہووے گا۔ پرائمری سکولاں اُتے محنت تے فوکس کرنا چاہیدا اے تاں جو تعلیمی بنیاد مضبوط ہووے۔
اوہناں آکھیا کہ 12 ضلعیاں دیاں 31 تحصیلاں وچ 35 ہزار ٹیچراں دی انگلش لرننگ مکمل کر لئی گئی اے۔ مار پیٹ دا ڈرامہ بچے دی زندگی اُتے تاحیات اثر انداز ہُندا اے۔ پنجاب دے سکولاں وچ ڈیجیٹل لٹریسی ودھاؤن اُتے توجہ دِتی جا رہی اے۔
دریں اثناء وزیراعلیٰ پنجاب مریم نواز شریف نے ڈاکٹر نجیب نقی نوں آزاد جموں و کشمیر دے 25ویں صدر منتخب ہون اُتے مبارکباد دِتی تے اوہناں لئی نیک تمناؤاں دا اظہار کیتا۔
