اج لاہور وچ جلسہ، وزیراعظم کولوں ریلیف نہ ملیا تاں لانگ مارچ فیر شروع: حافظ نعیم
لوک نال نیں تاں تبدیلی نہیں آوے گی، سیٹاں دی چاہت نال انقلاب نہیں آوے گا، لوکاں نوں اعتماد وچ لو، سیٹاں آپ آون گیاں، دستخطی مہم شروع، دو کروڑ افراد دستخط کرن گے: خطاب
حکومت پی ٹی آئی دی پیشکش دا مثبت جواب دے، لیاقت بلوچ
لاہور (سیاسی نمائندہ) امیر جماعت اسلامی حافظ نعیم الرحمن نے آکھیا اے کہ وزیراعظم نال ملاقات وچ ریلیف نہ ملیا تاں لانگ مارچ شروع کر دیواں گے۔ مطالبیاں لئی دستخطی مہم شروع کر دِتی اے تے گھٹ توں گھٹ دو کروڑ افراد دے دستخط کروائے جان گے۔ احتجاجی کیمپ، ریلیاں تے جلسے جاری رکھاں گے۔
اوہناں آکھیا کہ جماعت اسلامی اپنی تحریک توں دستبردار نہیں ہوئی۔ جماعت اسلامی نے اج لاہور وچ جلسے دا وی اعلان کیتا اے۔ کارکنان نوں آن لائن خطاب کردیاں امیر جماعت اسلامی نے آکھیا کہ رائے عامہ ہموار کیتے بغیر انقلاب نہیں لیا جا سکدا۔ جے عوام جماعت اسلامی نال نہیں جڑن گے تاں تبدیلی نہیں لیائی جا سکدی۔
آئی پی پیز دے خلاف جدوجہد نال عوام نوں ریلیف ملیا۔ پٹرول دے مسئلے اُتے کوئی سیاسی جماعت آواز نہیں چک رہی سی۔ کجھ ماہ پہلاں لوکاں نوں پٹرولیم لیوی بارے کجھ وی پتا نہیں سی۔
اسیں سمجھایا کہ لیوی دا پٹرول دی قیمت نال کوئی تعلق نہیں، ایہ جگا ٹیکس اے۔ ہُن روزانہ میڈیا اُتے لیوی ختم کرن دیاں گلاں ہوندیاں نیں۔
حافظ نعیم نے آکھیا کہ حکومتی تے اپوزیشن جماعتاں عوامی مسئلیاں اُتے گل نہیں کر سکدیاں۔ ایہ سیاسی جماعتاں مافیا دے ذریعے چل دیاں نیں تے انہاں دے جلسے وی مافیا کرواندے نیں۔
اوہناں آکھیا کہ کجھ سیٹاں لین دی چاہت انقلاب برپا نہیں کر سکدی۔ عوام نوں اعتماد وچ لو تاں سیٹاں آپ چل کے آون گیاں۔
دوجے پاسے منصورہ وچ پریس کانفرنس نوں خطاب کردیاں لیاقت بلوچ نے اج لاہور وچ جلسہ عام دا اعلان کیتا۔
اوہناں آکھیا کہ لانگ مارچ نوں کجھ دناں لئی حکمت عملی دے تحت ملتوی کیتا گیا اے۔ وزیراعظم وطن واپسی اُتے بناں تاخیر پٹرولیم لیوی بارے گَل بات شروع کرن۔
حکومت نے جماعت اسلامی تے پی ٹی آئی کارکنان دے ٹکراؤ دا جال وچھایا سی، جیہڑا ناکام کر دِتا گیا اے۔
ہور آکھیا کہ اسلام آباد سومنات نہیں تے نہ ہی کسے دی جاگیر اے۔ جتھے پالیسی ساز ادارے، سپریم کورٹ تے پارلیمنٹ موجود نیں، اوتھے ہر سیاسی پارٹی نوں احتجاج دا حق اے۔
پی ٹی آئی دے احتجاج دی حمایت تے کارکنان، خاص طور اُتے خواتین دیاں گرفتاریواں دی مذمت کردے آں۔ علامہ راجہ ناصر عباس، محمود خان اچکزئی تے بیرسٹر گوہر نے حکومت نوں مذاکرات دی پیشکش کیتی اے۔ حکومت دی ذمہ داری اے کہ اوہ مثبت جواب دے تے گَل بات لئی کمیٹی تشکیل دے۔
