لاہور ہائیکورٹ: عظمیٰ تے نورین دی نظر بندی دا نوٹیفکیشن فوری معطل کرن دی استدعا مسترد
متعلقہ فریقین نوں نوٹس جاری، 2 ایم پی ایز دیاں نظر بندیاں خلاف وی درخواستاں دی سماعت، لارجر بینچ دا فیصلہ طلب
ڈپٹی کمشنر سیالکوٹ نے غیر مشروط معافی منگ لئی، عدالت نے مبشر اعوان دی نظر بندی خلاف درخواست نمٹا دِتی
لاہور (کورٹ رپورٹر) لاہور ہائیکورٹ نے بانی پی ٹی آئی دی بہن ڈاکٹر عظمیٰ خان تے نورین نیازی دی نظر بندی دا نوٹیفکیشن فوری معطل کرن دی استدعا مسترد کر دِتی تے فریقین نوں نوٹس جاری کر کے جواب طلب کر لیا، جدوں کہ عدالت نے 27 ستمبر توں پہلاں پی ٹی آئی دے 2 ایم پی ایز اعجاز شفیع تے شیخ امتیاز محمود دیاں نظر بندیاں خلاف درخواستاں اُتے نظر بندی بارے لارجر بینچ دا فیصلہ طلب کر لیا۔
جسٹس عبہر گل خان نے ڈاکٹر عظمیٰ دی بیٹی سکینہ بی بی دی درخواست اُتے سماعت کیتی۔ درخواست گزار دے وکیل رانا مدثر عمر نے مؤقف اختیار کیتا کہ دونوں گھریلو خواتین نیں، عظمیٰ دے خلاف درج 9 مئی دے مقدمے وچ اوہ بے قصور قرار دِتیاں جا چکیاں نیں۔
عدالت نے نظر بندی دا نوٹیفکیشن فوری معطل کرن دی استدعا مسترد کردیاں فریقین نوں نوٹس جاری کر کے جواب طلب کر لیا۔
علاوہ ازیں جسٹس عبہر گل نے 2 ایم پی ایز اعجاز شفیع تے شیخ امتیاز محمود دیاں نظر بندیاں خلاف دائر وکھ وکھ درخواستاں اُتے وی سماعت کیتی۔ وکیل نے آکھیا کہ اس توں پہلاں وی لارجر بینچ دا فیصلہ لایا گیا سی، پر درخواست نوں ناقابلِ سماعت قرار دے دِتا گیا۔
جسٹس عبہر گل نے ناراضگی دا اظہار کردیاں آکھیا، ’’تسی عدالت دے سامنے ہی غلط بیانی کر رہے او۔‘‘
لاہور ہائیکورٹ دے جسٹس سردار اکبر علی ڈوگر نے پی ٹی آئی رہنما مبشر اعوان دی نظر بندی خلاف دائر درخواست اُتے ڈی سی سیالکوٹ ولوں غیر مشروط معافی منگن تے نظر بندی دا حکم واپس لین دے بیان اُتے درخواست نمٹا دِتی۔
