نویں انتظامی یونٹس اُتے شفاف ریفرنڈم کروایا جا سکدا اے: فاروق ستار
عوام نوں ایہ حق ملنا چاہیدا اے کہ اوہ آپ فیصلہ کرن کہ اوہ کی چاہندے نیں: رہنما
ایم کیو ایم دے 25 ٹاؤنز دے ریٹائر ملازماں نوں واجبات نہیں ملے، حق ادا کیتا جاوے: پریس کانفرنس
کراچی (مانیٹرنگ ڈیسک) ایم کیو ایم پاکستان دے سینئر رہنما ڈاکٹر فاروق ستار نے آکھیا اے کہ سندھ وچ 6 انتظامی یونٹ بنن گے تے صوبے دے وسائل سارے علاقیاں وچ برابر تقسیم ہون گے۔ کراچی، حیدرآباد، میرپورخاص، سکھر، لاڑکانہ تے ہور علاقیاں نوں ترقی دے یکساں موقعے ملنے چاہیدے نیں۔
پریس کانفرنس کردیاں اوہناں آکھیا کہ سندھ دے پیسیاں اُتے ساریاں دا حق اے۔ عمرکوٹ، تھرپارکر، سکھر تے ہور شہراں نوں وی ترقی دِتی جاوے۔ نویں انتظامی یونٹس دے ذریعے اختیار ہتھلے پدھر تک منتقل کیتے جا سکدے نیں۔
عوام نوں ایہ حق ملنا چاہیدا اے کہ اوہ آپ فیصلہ کرن کہ اوہ کی چاہندے نیں۔ اس مقصد لئی صاف تے شفاف ریفرنڈم وی کروایا جا سکدا اے۔
فاروق ستار نے آکھیا کہ 25 ٹاؤنز دے کئی ملازم ریٹائر ہو چکے نیں، پر انہاں نوں ریٹائرمنٹ توں بعد ملن والے واجبات ادا نہیں کیتے گئے۔ ملازماں دیاں تنخواہواں وچوں کٹّن والی رقم کے ایم سی دے اکاؤنٹ وچ جمع ہُندی رہی، ایس لئی ریٹائرڈ ملازماں نوں انہاں دا حق ملنا چاہیدا اے۔
اوہناں آکھیا کہ جے میئر نوں اختیار دِتے جان تاں بلدیاتی نظام بہتر انداز وچ کم کر سکدا اے۔ ایم کیو ایم نویں انتظامی یونٹس تے بااختیار بلدیاتی نظام دے مؤقف اُتے قائم اے تے اس معاملے اُتے سیاسی جدوجہد جاری رکھے گی۔
