ن لیگ دے نجیب نقی 32 ووٹ لے کے آزاد کشمیر دے صدر منتخب

مدمقابل لطیف اکبر نے 13 ووٹ حاصل کیتے، نو منتخب صدر نے حلف چک لیا

مظفرآباد (محمد اسلم میر) مسلم لیگ ن دے ڈاکٹر محمد نجیب نقی 32 ووٹ لے کے آزاد جموں کشمیر دے 23ویں صدر منتخب ہو گئے۔ انہاں دے مدمقابل پاکستان پیپلز پارٹی دے امیدوار چودھری لطیف اکبر نے 13 ووٹ حاصل کیتے۔

صدارتی انتخاب لئی پولنگ قانون ساز اسمبلی سیکرٹریٹ وچ ہوئی۔ ووٹاں دی گنتی مکمل ہون اُتے نجیب نقی دی کامیابی دا اعلان کیتا گیا۔ 46 رکنی ایوان وچ سپیکر چودھری طارق فاروق نے وی ووٹ کاسٹ کیتا۔ پیپلز پارٹی دے چودھری قاسم مجید دی غیر حاضری دے باعث انہاں دا ووٹ کاسٹ نہ ہو سکیا۔

چیف سیکرٹری آزاد کشمیر خوشحال خان نے صدر آزاد کشمیر دے انتخاب دا نوٹیفکیشن پڑھ کے سنایا۔ بعد وچ ڈاکٹر نجیب نقی نے اپنے عہدے دا حلف چک لیا۔ چیف جسٹس آزاد جموں و کشمیر سپریم کورٹ جسٹس راجہ سعید اکرم نے ایوانِ صدر وچ منعقدہ پروقار تقریب دوران انہاں کولوں حلف لیا۔

تقریب وچ وزیراعظم افتخار گیلانی، وفاقی وزیر امورِ کشمیر امیر مقام، وفاقی وزیر طارق فضل، رانا ثنا اللہ تے ہور شخصیات نے شرکت کیتی۔

حلف برداری توں بعد صدر آزاد کشمیر نوں پولیس دے چاق و چوبند دستے ولوں گارڈ آف آنر پیش کیتا گیا۔ وزیراعظم شہباز شریف تے مسلم لیگ ن آزاد کشمیر دے صدر شاہ غلام قادر نے نجیب نقی نوں مبارکباد دِتی۔