قانون دی خلاف ورزی اُتے لوہے دے ہتھاں نال نمٹیا جاوے گا: آئی جی پنجاب
لاہور (کورٹ رپورٹر) آئی جی پنجاب راؤ عبد الکریم نے آکھیا اے کہ 27 ستمبر نوں کسے نوں توڑ پھوڑ کرن تے قانون نوں اپنے ہتھ وچ لین دی اجازت نہیں دیواں گے، جے کسے نے احتجاج کرنا اے تاں متعلقہ ڈی سی کولوں اجازت لئی جائے۔
انہاں خیالات دا اظہار اوہناں نے گزشتہ روز لاہور ہائیکورٹ پیشی دے موقع اُتے میڈیا نال گل کردیاں کیتا۔ آئی جی پنجاب نے ہور آکھیا کہ سب نوں صاف طور اُتے ایہ پیغام دینا چاہندا واں کہ قانون دی خلاف ورزی اُتے آہنی ہتھاں نال نمٹیا جائے گا، جے کسے نے احتجاج کرنا اے تاں متعلقہ ڈی سی کولوں اجازت لئی جائے، میرے علم وچ نہیں کہ کسے نے احتجاج لئی درخواست دِتی ہووے، کسے دے خلاف امتیازی کارروائی نہیں ہووے گی۔
اوہناں آکھیا کہ پولیس دی خود احتسابی دا بڑا چنگا نظام اے، دورانِ ریڈ گھراں وچ توڑ پھوڑ دا الزام درست نہیں، جے کسے نوں گھراں وچ توڑ پھوڑ دی شکایت اے تاں ساڈے شکایت سیل نال رجوع کرے۔
