بلوچستان وچ دفعہ 144 نافذ، چہرہ ڈھانپن اُتے وی پابندی
کوئٹہ (سٹاف رپورٹر) بلوچستان حکومت نے صوبے بھر وچ امن و امان تے عوامی تحفظ دے پیش نظر دفعہ 144 نافذ کردیاں ہتھیاراں دی نمائش، عوامی مقامات اُتے پنج یا ودھ افراد دے اجتماع تے چہرہ ڈھانپن اُتے پابندی لا دِتی اے۔
محکمہ داخلہ بلوچستان ولوں جاری حکم نامے دے مطابق پابندیاں فوری طور اُتے نافذ العمل ہون گیاں تے 30 روز تک جاری رہن گیاں، جنہاں نوں مجاز اتھارٹی قانون دے مطابق واپس، تبدیل یا توسیع دے سکدی اے۔
حکم نامے دے تحت عوامی مقامات اُتے کِسے وی قسم دے ہتھیار دی نمائش، نال رکھن یا استعمال اُتے پابندی لائی گئی اے، تاہم قانون دے تحت خصوصی طور اُتے مجاز افراد یا مقامات اِس پابندی توں مستثنیٰ ہون گے۔
اِسی طرح عوامی مقامات اُتے پنج یا اس توں ودھ افراد دے اجتماع، دھرنیاں، جلوساں، ریلیاں، مظاہریاں تے ہور ایس نوعیت دے اجتماعات اُتے وی پابندی لا دِتی گئی اے۔
حکم نامے وچ عوامی مقامات اُتے نقاب، ماسک یا کِسے وی ایسے ذریعے نال چہرہ ڈھانپن یا چھپاؤن اُتے وی پابندی لائی گئی اے، جِس نال کِسے شخص دی شناخت ممکن نہ رہے۔
