مریم نواز ولوں بہترین کارکردگی اُتے ’’ہسپتال آف دی منتھ‘‘ دا اعزاز دین دا اعلان
صوبے دے 300 رورل ہیلتھ سنٹرز نوں ہسپتالاں وچ بدلّن دا فیصلہ، ہر ضلع وچ سٹی سکین مشین مہیا کرن دا حکم، اخبار اج وی اطلاعات دا مستند ذریعہ: وزیراعلیٰ، لاہور چیمبر دے نو منتخب عہدیداراں نوں مبارکباد
لاہور (مانیٹرنگ ڈیسک) وزیراعلیٰ پنجاب مریم نواز شریف نے آکھیا اے کہ صوبے بھر وچ بہترین کم کرن اُتے ’’ہسپتال آف دی منتھ‘‘ دا اعزاز دِتا جاوے گا۔ انہاں خیالات دا اظہار انہاں اپنی صدارت وچ منعقدہ ویڈیو لنک اجلاس نوں خطاب کردیاں کیتا۔
ایس موقع اُتے صوبائی سیکرٹری پرائمری ہیلتھ اینڈ پاپولیشن نادیہ ثاقب نے تفصیلی بریفنگ دِتی، جس وچ دسیا گیا کہ مختصر مدت وچ صرف 911 کلینک آن ویلز توں 3 کروڑ مریض مستفید ہو چکے نیں۔
دوجے پاسے وزیراعلیٰ نے پنجاب دے 300 مریم نواز ہاسپٹلز (رورل ہیلتھ سنٹرز) نوں مکمل ہسپتالاں وچ بدلّن دا فیصلہ کر لیا اے، جدوں کہ پنجاب وچ پہلی واری کلینک آن ویلز لئی ڈیجیٹل میڈیکل باکس متعارف کراؤن دا فیصلہ وی کیتا گیا اے۔
ڈیجیٹل میڈیکل باکس وچ الٹراساؤنڈ، بلڈ شوگر، سی بی سی تے ای سی جی کیتی جا سکے گی۔ ایس طرح موبائل نال لنک ہون والی سمارٹ الٹراساؤنڈ ڈیوائس وی متعارف کرائی جاوے گی۔
علاوہ ازیں وزیراعلیٰ نے ناقص کارکردگی تے فرائض توں غفلت اُتے 4 ہسپتالاں دے ایم ایس فوری تبدیل کرن تے ہنگامی صورتحال لئی ڈاکٹرز تے ایم ایس دا پول قائم کرن دی ہدایت کیتی۔
انہاں نے ضلعی تے تحصیل ہسپتالاں وچ صفائی دی صورتحال تے پارکنگ دے معاملات بہتر بناؤن دا حکم وی دِتا۔
وزیراعلیٰ مریم نواز شریف نوں بریفنگ وچ دسیا گیا کہ پنجاب وچ 40 ہزار توں ودھ ڈاکٹرز تے الائیڈ ہیلتھ سٹاف دی بھرتی کیتی جا چکی اے۔ 2524 ڈاکٹرز، 2482 ویمن میڈیکل آفیسرز، 408 کنسلٹنٹس تے 32 کارڈیالوجسٹس دیاں خدمات حاصل کر لئیاں گئیاں نیں۔
7572 ایل ایچ وی تے 5048 سپورٹ سٹاف وی پنجاب دے ہسپتالاں وچ تعینات کیتا جا چکیا اے۔
وزیراعلیٰ مریم نواز شریف نے ہر ضلع وچ نویں سٹی سکین مشین مہیا کرن تے موسمی تے عام بیماریواں لئی ٹیلی میڈیسن سنٹر قائم کرن دا حکم دِتا۔
پنجاب وچ پہلی واری مریض دے معیاری علاج دے تجزیے لئی کلینک کوالٹی کنٹرول آفیسر تعینات کیتا جاوے گا۔
3444 ذیابیطس ٹائپ ون دے مریضاں، ہیپاٹائٹس دے 14286 تے ٹی بی دے 13864 مریضاں لئی ادویات گھر وچ فراہم کیتیاں گئیاں۔
پرائیویٹ کلینکس نوں ایچ آئی ایم ایس سسٹم نال منسلک کرن لئی قانون سازی اُتے اتفاق کیتا گیا۔
ادھر مطالعۂ اخبارات دے حوالے نال ریڈرشپ ڈے اُتے خصوصی پیغام وچ مریم نواز نے آل پاکستان نیوز پیپر سوسائٹی، پرنٹ میڈیا نال وابستہ صحافیاں، متعلقہ تنظیماں دے عہدیداراں تے ارکان نوں مبارکباد دِتی۔
انہاں اخبارات دے قارئین نوں وی خصوصی خراجِ تحسین پیش کردیاں آکھیا کہ اخبار معلومات دی بھرمار دے موجودہ دور وچ وی اطلاعات دا مستند ذریعہ اے۔ اخبارات وچ ایڈیٹوریل چیک دے ذریعے غلط تے گمراہ کن معلومات نوں روکنا قابلِ تحسین تے قابلِ تقلید اے۔
اخبارات نے ہر دور وچ شعور تے آگاہی پیدا کرن تے رائے عامہ دی صحیح سمت وچ رہنمائی لئی اہم کردار ادا کیتا اے۔
وزیراعلیٰ مریم نواز نے آکھیا کہ قیامِ پاکستان دی تحریک دوران اخبارات نے عوام وچ آزادی دا شعور بیدار کیتا۔ تحریکِ آزادی دوران سیاسی سرگرمیاں دے نال نال صحافتی جدوجہد وی تاریخ دا حصہ اے۔
وزیراعلیٰ مریم نواز شریف نے آکھیا کہ ڈیجیٹل تے سوشل میڈیا دے دور دے باوجود پرنٹ دی افادیت برقرار رہوے گی۔ گمراہ کن اطلاعات دے دور وچ معروضی صحافت دی ضرورت پہلے نالوں کہیں ودھ اے۔
نوجوان نسل نوں درست معلومات تک رسائی لئی اخبارات دے مطالعے اُتے توجہ دین دی ضرورت اے۔
دریں اثنا وزیراعلیٰ پنجاب نال صوبائی وزیر خواجہ عمران نذیر نے ملاقات کیتی۔ مریم نواز نے لاہور چیمبر آف کامرس اینڈ انڈسٹری الیکشن کمپین اُتے خواجہ عمران نذیر نوں شاباش دِتی۔
مریم نواز نے لاہور چیمبر آف کامرس دے نومنتخب عہدیداراں نوں مبارکباد دِتی تے الیکشن وچ کامیابی اُتے ویژن الائنس دے رہنما علی حسام اصغر، خواجہ شاہ زیب اکرم تے ہوراں لئی نیک تمناؤں دا اظہار کیتا اے۔
