فارم 47 دے سہارے کھڑیاں پیپلز پارٹی تے ن لیگ جلد بہہ جان گیاں: حافظ نعیم
لانگ مارچ صرف روکیا اے، ختم نئیں کیتا، حکومت اوچھے ہتھکنڈیاں تے فسطائیت توں باز آ جاوے: امیر جماعت اسلامی
حکمران پرتعیش گاڑیاں، جہاز نئیں چھڈدے، قربانی عوام توں منگدے نیں، اپنی عیاشیاں بند کرن: جلسے توں خطاب
لاہور امیر جماعت اسلامی حافظ نعیم الرحمن نے آکھیا اے کہ پیپلز پارٹی تے ن لیگ ورگیاں پارٹیاں پرانیاں ہو چکیاں نیں، ایہ صرف فارم 47 دے سہارے اُتے کھڑیاں نیں، جلد عوام دے اگے بہہ جان گیاں۔ حکومت اوچھے ہتھکنڈیاں تے فسطائیت توں باز آ جاوے۔ پٹرولیم لیوی دے خلاف تحریک جاری اے، کنٹینر تے پابندیاں جماعت اسلامی دا رستہ نئیں روک سکدیاں۔ اسلام آباد مارچ دا آغاز اوتھوں ہی ہووے گا جتھوں قافلے رکے سن۔ اساں میدان نئیں چھڈیا، پوری طاقت تے استقامت نال موجود آں۔
انہاں خیالات دا اظہار انہاں وحدت روڈ لاہور وچ جلسہ عام نوں خطاب کردیاں کیتا۔ نائب امیر لیاقت بلوچ، امیر لاہور ضیا الدین انصاری، امیر پنجاب وسطی جاوید قصوری تے قائم مقام سیکرٹری جنرل حلقہ خواتین ثمینہ سعید نے وی شرکاء نال خطاب کیتا۔ قائم مقام سیکرٹری جنرل نذیر احمد جنجوعہ، ڈپٹی سیکرٹریز اظہر اقبال، شیخ عثمان، مشیر امیر جماعت اسلامی ڈاکٹر فرید پراچہ تے سیکرٹری اطلاعات شکیل ترابی وی اس موقعے اُتے موجود سن۔
امیر جماعت اسلامی نے حکومت توں پٹرولیم لیوی ختم کرن تے پٹرول دیاں قیمتاں گھٹ کرن دا مطالبہ کردیاں آکھیا کہ اپنے دیرینہ مطالبے اُتے کسے صورت سمجھوتہ نئیں کران گے۔ عوام نوں ریلیف نہ دِتا گیا تاں قافلے وفاقی دارالحکومت ول روانہ ہوون گے، کنٹینر لا کے عوامی سیلاب نئیں روکیا جا سکدا۔
انہاں آکھیا کہ پٹرولیم لیوی دے نفاذ تے آئی پی پیز نال سیاسی جماعتاں وی شریک نیں، انہاں دے مفادات مافیاز نال جڑے ہوئے نیں۔ حکومت آئی پی پیز نوں اوہنی بجلی دے وی پیسے دیندی اے جو بن دی ہی نئیں۔ حکمران پرتعیش گاڑیاں تے جہاز نئیں چھڈدے تے عوام توں قربانی منگدے نیں۔ حکمران اپنی عیاشیاں تے آئی پی پیز نوں ادائیگیاں بند کرن۔
انہاں مزید آکھیا کہ حکومت نے ساڈے جلسے دے راستے بند کرن دی کوشش کیتی، سانوں جلسے دے انتظامات نئیں کرن دِتے گئے، کارکنان نے حکومت دے سارے انتظامات ختم کرکے جلسہ کیتا۔ حکومت اپنے ہتھکنڈیاں توں باز آ جاوے۔
حافظ نعیم الرحمن نے آکھیا کہ ہُن جیہڑے پاکستان وچ سیاست کرنی اے، اوہنوں عوام دی خدمت دی سیاست کرنی پئے گی۔ ہُن جیہڑا عوام دے نال نئیں کھڑوے گا، اوہ نئیں رہے گا۔ انہاں آکھیا کہ حکمراناں دا اک اک بیرون ملک دورہ عوام نوں کروڑاں وچ پیندا اے۔ ایہ جیہڑے لینڈ مافیا، پٹرول مافیا تے ہور مافیا ساڈے سراں اُتے مسلط نیں، ایہ نئیں بچن گے۔
