افغانستان توں دراندازی ناکام، پوسٹاں تباہ، کئی ہلاک، بلوچستان وچ 146 دہشتگرد مارے گئے

چمن سیکٹر وچ افغان طالبان ولوں جارحیت اُتے سکیورٹی فورسز دا بھرپور جواب، کواڈ کاپٹرز تے مارٹر فائر دا استعمال، شابان وچ 5، نوشکی وچ 10 دہشتگرد ہلاک، 21 ستمبر توں ہُن تک 33 دہشتگرد مارے گئے، وزیراعظم ولوں خراجِ تحسین

راولپنڈی، اسلام آباد پاک افغان سرحدی علاقے چمن سیکٹر وچ افغانستان ولوں جارحیت تے دراندازی دی کوشش سکیورٹی فورسز نے بروقت کارروائی کردیاں ناکام بنا دِتی، جوابی کارروائی وچ کئی افغان طالبان ہلاک ہون دی اطلاعات نیں۔

سکیورٹی ذرائع دے مطابق 25 ستمبر نوں پاک افغان سرحد دے چمن سیکٹر وچ افغان پاسوں اشتعال انگیز فائرنگ تے دراندازی دی کوشش کیتی گئی، جس دا پاکستانی سکیورٹی فورسز نے مؤثر تے بھرپور جواب دِتا۔ ذرائع دے مطابق پاکستانی افواج نے بروقت جوابی کارروائی کردیاں افغان طالبان ولوں قائم کیتیاں پوسٹاں نوں نشانہ بنایا۔ کارروائی وچ کواڈ کاپٹرز تے مارٹر فائر دا وی استعمال کیتا گیا، جس دے نتیجے وچ جارحیت وچ ملوث افغان طالبان دیاں کئی پوسٹاں تباہ کر دِتیاں گئیاں۔

سکیورٹی ذرائع دا کہنا اے کہ پاکستانی فورسز دی مؤثر کارروائی دے نتیجے وچ افغان پاسوں پاکستان دی حدود وچ دراندازی دا منصوبہ ناکام بنا دِتا گیا۔ ذرائع دے مطابق پاک فوج تے سکیورٹی فورسز سرحدی علاقیاں وچ صورتحال اُتے کڑی نظر رکھے ہوئے نیں تے افغان سرزمین توں پاکستان دی حدود وچ ہون والی کسے وی دراندازی یا جارحیت دا بروقت تے مؤثر جواب دین لئی ہر ویلے تیار نیں۔

دریں اثنا بلوچستان وچ بھارتی سرپرستی وچ سرگرم فتنۃ الخوارج تے فتنۃ الہندوستان دے خلاف سکیورٹی فورسز دیاں کارروائیاں جاری نیں۔ 24 تے 25 ستمبر نوں ہون والیاں کارروائیاں وچ ہور 16 دہشتگرد ہلاک ہوگئے۔

پاک فوج دے شعبہ تعلقاتِ عامہ (آئی ایس پی آر) دے مطابق 21 ستمبر توں بلوچستان وچ جاری جامع انسدادِ دہشتگردی کارروائیاں دوران ہُن تک 33 بھارتی سرپرستی وچ سرگرم خوارج تے دہشتگرد ہلاک کیتے جا چکے نیں۔

آئی ایس پی آر دے مطابق ضلع کوئٹہ دے علاقے شابان وچ آپریشن شابان دے تسلسل وچ 24 ستمبر نوں سکیورٹی فورسز نے دہشتگرداں دے ہور ٹھکانیاں دا سراغ لا کے کارروائی کیتی۔ شدید فائرنگ دے تبادلے وچ ہور 5 بھارتی سرپرستی وچ سرگرم خوارج ہلاک ہوئے، جس توں بعد شابان وچ ہلاک دہشتگرداں دی تعداد 22 ہوگئی۔

کارروائی دوران دہشتگرداں دے ٹھکانیاں توں اسلحہ، گولہ بارود تے دھماکا خیز مواد وی برآمد کیتا گیا۔ علاقے وچ کلیئرنس آپریشن خطرے دے مکمل خاتمے تک جاری رہے گا۔

آئی ایس پی آر دے مطابق 25 ستمبر نوں ضلع نوشکی وچ وی انٹیلی جنس بیسڈ آپریشن کیتا گیا۔ کارروائی دوران سکیورٹی فورسز نے دہشتگرداں دے ٹھکانے نوں مؤثر انداز وچ نشانہ بنایا، جس دے نتیجے وچ شدید فائرنگ دے تبادلے توں بعد 11 دہشتگرد ہلاک ہوگئے۔

آئی ایس پی آر دا کہنا اے کہ عزمِ استحکام دے تحت سکیورٹی فورسز تے قانون نافذ کرن والے اداریاں دیاں غیر ملکی سرپرستی تے معاونت نال ہون والی دہشتگردی دے خاتمے لئی کارروائیاں پوری رفتار نال جاری رہن گیاں۔

وزیراعظم شہباز شریف نے خراجِ تحسین پیش کردیاں آکھیا کہ دہشتگردی دے مکمل خاتمے تک سکیورٹی فورسز تے قانون نافذ کرن والے اداریاں دیاں کارروائیاں پوری قوت نال جاری رہن گیاں۔ فتنۃ الخوارج تے فتنۃ الہندوستان سمیت غیر ملکی سرپرستی وچ ہون والی دہشتگردی دا مکمل خاتمہ حکومت دی اولین ترجیح اے۔