بلوچستان: فورسز دیاں کارروائیاں، چار روزاں وچ فتنۃ الہندستان دے 73 دہشتگرد ہلاک

زیارت، نوشکی تے مند وچ انٹیلی جنس بنیاداں اُتے آپریشن، بھاری مقدار وچ اسلحہ تے گولہ بارود وی برآمد
قوم سکیورٹی فورسز دے نال اے، دہشتگردی دے خاتمے تک آپریشن جاری رہن گے: صدر، وزیراعظم، وزیرِ داخلہ

اسلام آباد (نیوز ایجنسیاں، مانیٹرنگ ڈیسک) بلوچستان دے مختلف علاقیاں وچ سکیورٹی فورسز دے انٹیلی جنس بنیاداں اُتے آپریشن جاری نیں، گزشتہ 96 گھنٹیاں دوران مجموعی طور اُتے 73 دہشتگرد ہلاک ہوئے نیں۔

آئی ایس پی آر دے مطابق 21 ستمبر نوں زیارت تے گردونواح وچ شروع کیتے گئے آپریشن دوران شعبان وچ دہشتگرداں دے متعدد ٹھکانے تباہ کیتے گئے۔ شدید فائرنگ دے تبادلے وچ ہُن تک 33 بھارتی حمایت یافتہ دہشتگرد ہلاک ہوئے نیں، جدویں کہ دہشتگرداں کولوں اسلحہ، گولہ بارود تے دھماکہ خیز مواد وی برآمد کیتا گیا اے۔

ترجمان پاک فوج دے مطابق گزشتہ 72 گھنٹیاں دوران کارروائی وچ ہور 23 دہشتگرد مارے گئے، جدویں کہ سکیورٹی فورسز نے فتنۃ الخوارج تے فتنۃ الہندوستان دے زیرِ استعمال وسیع علاقے نوں کلیئر کر لیا اے۔ ممکنہ خطرے دے مکمل خاتمے تک کلیئرنس آپریشن جاری رہے گا۔

25 ستمبر نوں ضلع نوشکی وچ وی انٹیلی جنس بنیاداں اُتے کارروائی کیتی گئی، جس وچ 11 دہشتگرد ہلاک ہوئے۔ مند دے علاقے وچ اک ہور کارروائی دوران فتنۃ الہندوستان دے 6 دہشتگرد مارے گئے۔ مختلف آپریشنز دوران دہشتگرداں کولوں بھاری مقدار وچ اسلحہ تے گولہ بارود وی برآمد کیتا گیا۔

ترجمان دے مطابق آپریشنز نال بھارتی حمایت یافتہ افغان آلہ کاراں نوں وڈی ضرب لگی اے۔

ترجمان پاک فوج دا کہنا اے کہ عزمِ استحکام مہم پوری قوت نال جاری رہے گی تے سکیورٹی فورسز سمیت ہور ادارے غیر ملکی حمایت یافتہ دہشتگردی دے خاتمے لئی پُرعزم نیں۔

صدرِ مملکت آصف علی زرداری نے دہشتگرداں خلاف کامیاب کارروائیاں اُتے سکیورٹی فورسز نوں خراجِ تحسین پیش کردیاں آکھیا کہ بلوچستان وچ دہشتگرداں دے متعدد ٹھکانے کلیئر کرنا سکیورٹی فورسز دی وڈی کامیابی اے۔ غیر ملکی سرپرستی تے معاونت نال ہون والی دہشتگردی دے مکمل خاتمے لئی کارروائیاں جاری رہن گیاں۔ دہشتگردی خلاف جنگ وچ سکیورٹی فورسز دیاں قربانیاں تے خدمات قوم لئی باعثِ فخر نیں۔

وزیراعظم شہباز شریف نے آکھیا کہ دہشتگرداں دی ہلاکت سکیورٹی فورسز دی پیشہ ورانہ مہارت تے بہادری دا منہ بولدا ثبوت اے۔ دہشتگردی خلاف جنگ وچ پوری قوم اپنی بہادر سکیورٹی فورسز دے نال کھڑی اے۔ پاکستان دی سرزمین توں غیر ملکی سرپرستی وچ ہون والی دہشتگردی دا مکمل خاتمہ ساڈا عزم اے۔ عزمِ استحکام دے تحت دہشتگردی خلاف کارروائیاں پوری قوت تے عزم نال جاری رہن گیاں۔

وزیرِ داخلہ محسن نقوی نے آکھیا کہ دہشتگردی دے خاتمے لئی قوم سکیورٹی فورسز دے شانہ بشانہ کھڑی اے۔ فتنۃ الہندوستان تے فتنۃ الخوارج دے مکمل خاتمے تک آپریشن جاری رہن گے۔