سہیل آفریدی نوں ہٹاؤن لئی عمران خان دے پیغام دا دعویٰ، بیرسٹر گوہر دی تردید
بانی پی ٹی آئی لانگ مارچ نہ کرن اُتے برہم، لوکاں نوں نہ کڈیا تے عدم اعتماد لے آؤ، نورین دے ذریعے گنڈاپور نوں پیغام ملیا: ذرائع
سہیل آفریدی نوں عمران خان دا پکا اعتماد حاصل، سارے دعوے من گھڑت نیں، عوام کان نہ دھریں: چیئرمین پی ٹی آئی تے اہلخانہ
راولپنڈی (مانیٹرنگ ڈیسک) تحریک انصاف دے بانی عمران خان ولوں وزیراعلیٰ خیبر پختونخوا سہیل آفریدی نوں عہدے توں ہٹاؤن تے انہاں دے خلاف تحریکِ عدم اعتماد لیاؤن دی ہدایت دے دعوے سامنے آئے نیں، تاہم چیئرمین پی ٹی آئی بیرسٹر گوہر علی خان تے عمران خان دے اہلخانہ نے انہاں دعویاں دی سختی نال تردید کر دتی اے۔
ذرائع دے مطابق اڈیالہ جیل وچ ملاقات دوران عمران خان نے اپنی بھین نورین نیازی نال گل کردیاں سہیل آفریدی دی کارکردگی تے اسلام آباد مارچ نہ کرن اُتے مایوسی تے برہمی دا اظہار کیتا۔ ذرائع دے مطابق عمران خان نے آکھیا کہ سہیل آفریدی نے اوہناں لئی کجھ نہیں کیتا تے ایس توں پہلاں وی وکیل دے ذریعے پیغام بھجوایا سی کہ اوہ وزارتِ اعلیٰ چھڈ دین۔
نورین نیازی نے بانی پی ٹی آئی نوں دَسیا کہ سہیل آفریدی نے 27 ستمبر نوں اسلام آباد لانگ مارچ دا اعلان کیتا اے، جس اُتے عمران خان نے مبینہ طور اُتے سخت مؤقف اختیار کیتا۔ ذرائع دا دعویٰ اے کہ عمران خان نے ہدایت کیتی کہ جے سہیل آفریدی 27 ستمبر نوں اسلام آباد مارچ لئی نہ نکلن تے انہاں دے خلاف فوری طور اُتے تحریکِ عدم اعتماد لیائی جاوے۔
ذرائع دے مطابق عمران خان نے علی امین گنڈاپور نوں وی ایہو پیغام دین دی ہدایت کیتی کہ مارچ دی صورت وچ سہیل آفریدی دے خلاف عدم اعتماد لیائی جاوے۔ ذرائع دا کہنا اے کہ نورین نیازی دے ذریعے ایہ پیغام وزیراعلیٰ سہیل آفریدی تک پہنچن توں بعد انہاں نے حالات دی نزاکت دے پیشِ نظر مارچ تے احتجاج دے پروگرام وچ اچانک تبدیلی کیتی۔
ذرائع دے مطابق وزیراعلیٰ سہیل آفریدی ایس سارے معاملے وچ اک اہم وفاقی وزیر نال مسلسل رابطے وچ نیں تے مشترکہ حکمتِ عملی لئی گل بات جاری اے۔
دوجے پاسے تحریک انصاف دے چیئرمین بیرسٹر گوہر علی خان نے وزیراعلیٰ خیبر پختونخوا سہیل آفریدی نوں عہدے توں ہٹاؤن تے انہاں دے خلاف تحریکِ عدم اعتماد دے حوالے نال خبراں دی سختی نال تردید کر دتی۔
اپنے بیان وچ بیرسٹر گوہر نے آکھیا کہ عمران خان نے سہیل آفریدی دے خلاف کوئی پیغام نہیں بھیجیا۔ بیرسٹر گوہر دے مطابق سہیل آفریدی نوں عمران خان دا مکمل، غیر متزلزل تے پکا اعتماد حاصل اے۔
دریں اثنا عمران خان دے اہلخانہ ولوں جاری اعلامیے وچ نورین نیازی تے عمران خان دی ملاقات بارے چل رہیاں خبراں نوں لغو قرار دیندیاں آکھیا گیا اے کہ ملاقات نال منسوب کرکے میڈیا وچ نشر کیتے جان والے بیانات تے گل بات وچ کوئی صداقت نہیں، سارے دعوے من گھڑت نیں تے انہاں دا ملاقات وچ ہوئی گل بات نال کوئی تعلق نہیں۔
اعلامیے دے مطابق سپریم کورٹ دیاں ہدایات دے تحت نورین نیازی دی عمران خان نال آخری ملاقات 25 اگست 2026 نوں اڈیالہ جیل وچ ہوئی سی، جس دی تفصیل انہاں نے کسے نال شیئر نہیں کیتی۔
اہلخانہ نے آکھیا کہ من گھڑت بیانیہ ایسے ویلے پھیلایا جا رہیا اے جدوں نورین نیازی نوں بلاوجہ تے غیر قانونی طور اُتے تحویل وچ رکھیا گیا اے تے انہاں نوں انہاں دعویاں دی تردید یا وضاحت دا موقع وی حاصل نہیں۔
اہلخانہ نے ساریاں رپورٹا ں مسترد کردیاں عوام تے میڈیا نوں اپیل کیتی کہ ایہوجیہاں افواہاں اُتے کان نہ دھریں۔
