پاکستان، آئی ایم ایف مذاکرات دا اج اسلام آباد وچ آغاز
اسلام آباد (آن لائن) پاکستان تے بین الاقوامی مالیاتی فنڈ (آئی ایم ایف) دے وچکار باقاعدہ مذاکرات دا آغاز اج (پیر) توں اسلام آباد وچ ہووے گا، جس وچ پاکستانی وفد دی قیادت وزیرِ خزانہ کرن گے، جدوں کہ آئی ایم ایف مشن چیف دی سربراہی وچ وفد مذاکرات وچ شریک ہووے گا۔
وزارتِ خزانہ دے ذرائع دے مطابق دوناں فریقین دے وچکار گل بات دا ابتدائی سلسلہ 23 ستمبر توں کراچی وچ جاری اے، جیہڑا 7 اکتوبر تک جاری رہوے گا۔ مذاکرات دو مرحلیاں وچ ہون گے۔ پہلے مرحلے وچ تکنیکی سطح اُتے معاشی اعداد و شمار تے مطلوبہ معلومات آئی ایم ایف نال شیئر کیتیاں جان گیاں، جدوں کہ دوجے مرحلے وچ پالیسی امور اُتے تفصیلی تبادلۂ خیال کیتا جاوے گا۔
ذرائع دے مطابق توسیعی فنڈ سہولت تے موسمیاتی مالی معاونت دے دوناں پروگراماں دے جائزے اکٹھے کیتے جان گے۔ مذاکرات دوران پچھلے مالی سال دی آخری ششماہی وچ پاکستان دی کارکردگی دا جائزہ لین دے نال معاشی صورتحال تے موسمیاتی تبدیلی نال نمٹݨ لئی کیتے گئے اقدامات وچ پیش رفت وی زیرِ غور آوے گی۔
وزارتِ خزانہ دے ذرائع دا کہنا اے کہ پاکستان دوناں پروگراماں نال متعلق اہم اہداف حاصل کر چکیا اے۔ مذاکرات دی کامیابی دی صورت وچ دوناں پروگراماں دے تحت پاکستان نوں آئندہ قسطاں وچ مجموعی طور اُتے اک ارب 20 کروڑ ڈالر دی رقم ملن دی توقع اے۔
حکام دے مطابق دوناں پروگراماں دے تحت ہن تک پاکستان نوں آئی ایم ایف کولوں مجموعی طور اُتے 4 ارب 60 کروڑ ڈالر موصول ہو چکے نیں۔
واضح رہے کہ پاکستان ایس ویلے آئی ایم ایف دے نال اکٹھے دو قرض پروگراماں دا حصہ اے۔ انہاں وچ 7 ارب ڈالر توں ودھ مالیت دا توسیعی فنڈ سہولت پروگرام، جدوں کہ دوجا اک ارب 40 کروڑ ڈالر دا موسمیاتی مالی معاونت پروگرام شامل اے۔
