پچھلے ہفتے ڈیزل 15.51 روپے سستا، پٹرول 2.16 روپے مہنگا
22 توں 26 ستمبر تک پٹرول دو واری ودھیا، تِن واری گھٹیا، ڈیزل لگاتار پنج دن سستا ہویا، روزانہ قیمتاں دے تعین نال زراعت، ٹرانسپورٹ تے بنیادی ضروریات متاثر ہون لگ پئیاں۔
اسلام آباد (اسلم لُڑکا) مشرقِ وسطیٰ وچ جاری کشیدہ صورتحال دے اثرات نے ملکی معاشی تے سماجی نظام نوں وی بری طرح متاثر کرنا شروع کر دتا اے، جِس دے باعث پہلے توں مہنگائی دے بوجھ تھلے دبے عوام اُتے ہور معاشی دباؤ ودھدا جا رہیا اے۔ روزانہ قیمتاں دے تعین نال زراعت، ٹرانسپورٹ تے بنیادی ضروریات متاثر ہون لگ پئیاں۔
پچھلے ہفتے ڈیزل دی قیمت وچ لگاتار کمی دا رجحان رہیا، جدوں کہ پٹرول دی قیمت وچ دو واری اضافہ تے تِن واری کمی کیتی گئی۔ ڈیزل 15 روپے 51 پیسے فی لٹر سستا ہویا، جدوں کہ پٹرول دی قیمت وچ دو واری مجموعی طور اُتے 6 روپے 63 پیسے فی لٹر اضافہ کیتا گیا تے تِن واری کمی دے باعث ہفتے دوران پٹرول دی قیمت وچ مجموعی طور اُتے 2 روپے 16 پیسے فی لٹر اضافہ ہویا۔
22 ستمبر نوں پٹرول دی قیمت وچ 4 روپے 61 پیسے فی لٹر اضافہ کیتا گیا، جِس توں بعد نویں قیمت 393 روپے 75 پیسے فی لٹر مقرر ہوئی۔ 23 ستمبر نوں پٹرول دی قیمت وچ 1 روپے 70 پیسے فی لٹر کمی نال قیمت 392 روپے 5 پیسے فی لٹر اُتے آ گئی۔
24 ستمبر نوں ہور 1 روپے 93 پیسے فی لٹر کمی کیتی گئی، جِس دے بعد قیمت 390 روپے 12 پیسے فی لٹر مقرر ہوئی۔ 25 ستمبر نوں پٹرول دی قیمت وچ ہور 84 پیسے فی لٹر کمی نال قیمت 389 روپے 28 پیسے فی لٹر ہو گئی۔
26 ستمبر نوں پٹرول دی قیمت وچ 2 روپے 2 پیسے فی لٹر اضافہ کیتا گیا، جِس توں بعد نویں قیمت 391 روپے 30 پیسے فی لٹر مقرر ہوئی، جیہڑی تِن دناں لئی مقرر کیتی گئی۔
ایس طرح 22 ستمبر نوں ڈیزل دی قیمت وچ 1 روپے 96 پیسے فی لٹر کمی نال قیمت 422 روپے 8 پیسے فی لٹر مقرر ہوئی۔ 23 ستمبر نوں ہور 3 روپے 12 پیسے کمی دے بعد ڈیزل دی قیمت 418 روپے 96 پیسے فی لٹر ہو گئی۔
24 ستمبر نوں 4 روپے 21 پیسے فی لٹر کمی نال قیمت 414 روپے 75 پیسے فی لٹر، 25 ستمبر نوں 2 روپے 63 پیسے کمی نال 412 روپے 12 پیسے فی لٹر تے 26 ستمبر نوں 3 روپے 59 پیسے کمی نال ڈیزل دی قیمت 408 روپے 53 پیسے فی لٹر مقرر کیتی گئی۔
اج (پیر) توں فیر پٹرولیم مصنوعات دیاں قیمتاں دا تعین کیتا جاوے گا۔
