خیبر پختونخوا تے بلوچستان وچ سکیورٹی فورسز دے آپریشن، 7 دہشتگرد ہلاک

خیبر دے علاقے باڑہ وچ فتنہ الخوارج دے 5 دہشتگرد مارے گئے، ٹھکانے تباہ، جدید اسلحہ تے گولہ بارود برآمد، چاغی دے علاقے نوکچہ وچ فتنہ الہندوستان دے 2 دہشتگرد ہلاک، واٹر باؤزر نوں نذرِ آتش کرکے فرار ہورہے سن

کوئٹہ، اسلام آباد (سٹاف رپورٹر، خصوصی نیوز رپورٹر، دنیا نیوز) سکیورٹی فورسز نے خیبرپختونخوا تے بلوچستان وچ انٹیلی جنس بیسڈ آپریشنز کردیاں 7 دہشتگرداں نوں ہلاک کر دِتا۔

ملکی سلامتی دے قومی ویژن عزمِ استحکام دے تحت سکیورٹی فورسز نے خیبرپختونخوا دے قبائلی ضلع خیبر دے علاقے باڑہ وچ اک کامیاب انٹیلی جنس بیسڈ آپریشن کردیاں فتنہ الخوارج دے 5 بدنام دہشتگرداں نوں ہلاک کر دِتا۔

سکیورٹی ذرائع دے مطابق آپریشن دہشتگرداں دی موجودگی بارے مصدقہ خفیہ معلومات اُتے کیتا گیا۔ فورسز دی مؤثر تے تیز رفتار کارروائی دے نتیجے وچ خارجی دہشتگرداں دے ٹھکانے مکمل طور اُتے ملیا میٹ کر دِتے گئے، جدویں کہ ہلاک دہشتگرداں دے قبضے توں بھاری مقدار وچ جدید اسلحہ تے گولہ بارود وی برآمد کر لیا گیا اے۔

دریں اثنا سکیورٹی فورسز نے بلوچستان وچ امن دشمن عناصر دے مکمل خاتمے لئی جاری آپریشن ردالفتنہ 3 دے تحت ضلع چاغی دے علاقے نوکچہ وچ کامیاب کارروائی کردیاں فتنہ الہندوستان دے 2 دہشتگرداں نوں ہلاک کر دِتا۔

سکیورٹی ذرائع دے مطابق فتنہ الہندوستان نال وابستہ دہشتگرداں نے نوکچہ دے نیڑے اک خالی واٹر باؤزر نوں نذرِ آتش کرن توں بعد فرار ہون دی کوشش کیتی، تاہم علاقے وچ موجود سکیورٹی فورسز نے فوری تے مؤثر جوابی کارروائی کردیاں دوناں شرپسنداں نوں موقع اُتے ہی کیفرِ کردار تک پہنچا دِتا۔

ذرائع نے دسیا کہ مارے جان والے دہشتگرد این 40 قومی شاہراہ اُتے متعدد تھاواں اُتے دہشتگردی دیاں وارداتاں وچ ملوث سن۔ واضح رہے کہ ایس توں پہلاں 31 اگست نوں وی ایس علاقے وچ ایس نوعیت دی تخریب کاری وچ ملوث 11 دہشتگرد مارے گئے سن۔

سکیورٹی ذرائع نے ایس عزم دا اعادہ کیتا اے کہ فورسز ملک وچوں دہشتگردی دے مکمل ناسور دے خاتمے تے پائیدار قومی امن دے قیام لئی پرعزم نیں۔

وزیراعظم شہباز شریف نے فورسز نوں خراجِ تحسین پیش کردیاں آکھیا کہ پوری قوم نوں اپنے بہادر سپوتاں اُتے فخر اے۔ پاکستان دے امن تے استحکام نوں نقصان پہنچاؤن والے عناصر نوں انہاں دے مذموم عزائم وچ کامیاب نہیں ہون دِتا جاوے گا۔