گورنر خیبرپختونخوا دا تحریکِ انصاف نوں لانگ مارچ کرن دا چیلنج
پی ٹی آئی لانگ مارچ نہیں کر سکدی، ایہ میڈیا اُتے بڑھکاں مار دے نیں، لُک رہے نیں
پشاور گورنر خیبرپختونخوا فیصل کریم کنڈی نے آکھیا اے کہ جیہڑا پاکستان دے آئین نوں نہیں منے گا، اوہدے نال کوئی گل نہیں ہووے گی۔ سانوں پاکستان تے خیبرپختونخوا وچ امن لیانا اے۔
پشاور چیمبر آف کامرس اینڈ انڈسٹری دی تقریب توں بعد میڈیا نال گل بات دوران اوہناں تحریکِ انصاف نوں لانگ مارچ کرن دا چیلنج دیندیاں آکھیا کہ پی ٹی آئی لانگ مارچ نہیں کر سکدی۔ ایہ ہن اسلام آباد جان توں لُک رہے نیں، لُکن لئی گرفتاریاں دے رہے نیں۔ جدوں میدان سجیا تاں فیر گل ہووے گی۔
گورنر نے آکھیا کہ ایہ صرف میڈیا اُتے بڑھکاں مار دے نیں، عوام انہاں دے نال نہیں۔
اوہناں آکھیا کہ خیبرپختونخوا وچ دہشتگردی نوں کنٹرول کراں گے۔ دہشتگرداں تے انہاں دے سہولت کاراں نوں نہیں چھڈیا جاوے گا۔ دہشتگردی نوں کنٹرول کرنا پی ٹی آئی دے وس دی گل نہیں۔ ویسے وی صوبے وچ دہشتگردی دے سنگین حالات نیں، ایسے حالات وچ سیاسی مارچ دی کوئی گنجائش نہیں۔ 4 اکتوبر نوں وی مارچ نہیں ہووے گا۔
اوہناں دہشتگردی دا الزام افغانستان اُتے لاؤندیاں آکھیا کہ دہشتگردی افغانستان توں آ رہی اے، ایسی صورتحال وچ افغانستان نال بارڈر کیمیں کھولیا جا سکدا اے۔
گورنر راج دے حوالے نال اوہناں آکھیا کہ آئین وچ گورنر راج دی شق موجود اے۔
وزیراعلیٰ خیبرپختونخوا بارے اوہناں آکھیا کہ جے وزیراعلیٰ اپنے آپ نوں اینا کمزور سمجھدے نیں کہ انہاں کول اختیار نہیں، تاں انہاں نوں استعفیٰ دے دینا چاہیدا اے۔
