گندم دی ترسیل، آمدورفت دیاں رکاوٹاں دور کرو: سینیٹ کمیٹی
چیک پوسٹاں اُتے شہریاں نوں بلاوجہ ہراساں کیتے جان دیاں شکایتاں اُتے تشویش دا اظہار، سینیٹر دلاور دی زیرِ صدارت اجلاس، اشیائے ضروریہ دی فراہمی بارے تفصیلات طلب
اسلام آباد (سید قیصر شاہ) سینیٹ دی قائمہ کمیٹی برائے بین الصوبائی رابطہ نے بین الصوبائی ہم آہنگی مضبوط بناؤن، شہریاں دی آمدورفت وچ رکاوٹاں دور کرن، گندم دی بلا تعطل ترسیل تے سکیورٹی چیک پوسٹاں اُتے شہریاں نال بہتر رویہ اختیار کرن اُتے زور دِتا اے۔
سینیٹر دلاور خان دی زیرِ صدارت اجلاس وچ سینیٹرز ایمل ولی خان، روبینہ قائم خانی، سید کاظم علی شاہ، روبینہ خالد، ضمیر حسین گھمرو، سیف اللہ ابڑو تے خصوصی دعوت اُتے سینیٹر ہدایت اللہ نے شرکت کیتی۔ اہم صوبائی نمائندیاں دی عدم شرکت اُتے چیئرمین کمیٹی نے تشویش دا اظہار کردیاں آکھیا کہ مسلسل غیرحاضری نال عوامی مسئلے حل کرن وچ رکاوٹ پیدا ہُندی اے، وار وار غیرحاضری اُتے استحقاق دی تحریک یا عدالتی نوٹس زیرِ غور آ سکدے نیں۔
کمیٹی نے بین الصوبائی آمدورفت تے چیک پوسٹاں اُتے شہریاں نوں درپیش مشکلات دا جائزہ لیا۔ ارکان نے سکیورٹی دے نال شہریاں نال بہتر رویے، پولیس اہلکاراں دے کم دے دباؤ تے وسائل دی کمی دا وی ذکر کیتا۔
ایمل ولی خان نے قبائلی علاقیاں وچ تلاشی دوران خواتین دے پردے تے برقعے سمیت مقامی روایتاں دے احترام اُتے زور دِتا، جِنہاں نوں ڈی آئی جی خیبرپختونخوا نے مناسب قرار دِتا۔ سندھ پولیس حکام نے آکھیا کہ کسے برادری دے خلاف امتیازی پالیسی نہیں اے۔
کمیٹی نے کراچی، لاہور، راولپنڈی تے اسلام آباد دے درمیان سفر کرن والے شہریاں نوں بلاجواز ہراساں کیتے جان دیاں شکایتاں اُتے وی تشویش دا اظہار کیتا۔
کمیٹی نے بین الصوبائی گندم دی ترسیل، خوراک دے تحفظ تے سڑکاں دی بندش نال پیدا ہون والی تاخیر دا جائزہ لیندیاں شفاف نظام تے اشیائے ضروریہ دی بلا تعطل فراہمی بارے تحریری تفصیلات طلب کر لئیاں۔
ارکان نے صوبائی اسمبلیاں وچ متعصبانہ بیانات تے ویڈیو کلپس اُتے تشویش ظاہر کردیاں آکھیا کہ سیاسی قیادت ایسے بیانات دی روک تھام دی ذمہ دار اے۔
