ریونیو ریکارڈ نوں محض غلطی قرار دے کے بدل نہیں سکدے: آئینی عدالت
طے کرنا ضروری سی کہ 44 سال بعد اندراج وچ تبدیلی سیٹلمنٹ دا نتیجہ اے یا محض غلطی، اختیار محدود، سیٹلمنٹ کھولن یا متنازع ملکیتی حقوق دے فیصلے لئی استعمال نہیں ہو سکدا، لاہور ہائیکورٹ دا فیصلہ کالعدم، بورڈ آف ریونیو پنجاب دے ممبر جوڈیشل دا حکم بحال: فیصلہ
اسلام آباد (اے پی پی) وفاقی آئینی عدالت نے قرار دِتا اے کہ ریونیو ریکارڈ وچ لمبے عرصے توں برقرار اندراج نوں محض کلیریکل یا حسابی غلطی قرار دے کے مختصر کارروائی دے ذریعے تبدیل نہیں کیتا جا سکدا، جدویں کہ ملکیت یا قبضے دے متنازع حقوق دا فیصلہ مجاز سول عدالت یا متعلقہ فورم اُتے شواہد تے فریقین نوں سماعت دا موقع دے کے کرنا ضروری اے۔
جسٹس سید حسن اظہر رضوی، جسٹس عامر فاروق تے جسٹس سید ارشد حسین شاہ اُتے مشتمل تین رکنی بینچ نے اشرف رانا تے ہوراں دی ایف سی پی ایل اے نمبر 423/2025 اُتے فیصلہ سناندیاں لاہور ہائیکورٹ دا 13 اکتوبر 2025 دا فیصلہ کالعدم قرار دِتا تے بورڈ آف ریونیو پنجاب دے ممبر جوڈیشل-VII دا 15 مارچ 2018 دا حکم بحال کر دِتا۔
عدالت نے قرار دِتا کہ متنازع 15 مرلے زمین دا ریکارڈ 1971-72 دی سیٹلمنٹ دوران تبدیل ہویا تے تقریباً 44 سال تک برقرار رہیا۔ ایسی صورت وچ ایہ طے کرنا ضروری سی کہ تبدیلی باقاعدہ سیٹلمنٹ دا نتیجہ سی یا محض غلطی، جس لئی باقاعدہ تحقیقات درکار سن۔
پنجاب لینڈ ریونیو ایکٹ 1967 دی دفعہ 166 دے تحت اختیار محدود نوعیت دا اے، ایس دے ذریعے صرف کلیریکل غلطیاں درست کیتیاں جا سکدیاں نیں۔ ایہ اختیار حتمی سیٹلمنٹ کارروائی نوں دوبارہ کھولن یا متنازع حقوق دا فیصلہ کرن لئی استعمال نہیں کیتا جا سکدا۔
