چین دا عالمی امن تے ترقی وچ اہم کردار: شہباز شریف
سی پیک دے دوجے مرحلے وچ داخل، ساڈے دل اکٹھے دھڑکدے نیں: وزیراعظم، پاک چین تعلقات خارجہ پالیسی دا بنیادی ستون، چین دی سالگرہ دی تقریب توں خطاب
اسلام آباد وزیراعظم شہباز شریف نے چین دی 77ویں سالگرہ اُتے مبارک باد پیش کردیاں آکھیا اے کہ چین دا عالمی امن تے ترقی وچ اہم کردار اے تے اسیں سی پیک دے دوجے مرحلے وچ داخل ہو رہے آں۔
وزیراعظم شہباز شریف نے عوامی جمہوریہ چین دے قیام دی 77ویں سالگرہ دے موقع اُتے تقریب توں خطاب کردیاں آکھیا کہ چین دے قومی دن دی تقریب وچ شرکت میرے لئی باعثِ مسرت اے تے ایس موقع اُتے چین دے صدر شی جن پنگ تے چینی عوام نوں دل دیاں گہرائیاں توں مبارک باد پیش کردا ہاں۔
انہاں آکھیا کہ ایہہ تاریخی دن عظیم چینی قوم دی ثابت قدمی، اتحاد تے ناقابلِ تسخیر جذبے نوں خراجِ تحسین پیش کرن دا دن اے۔ عالمی امن، استحکام تے ترقی وچ چین دا انتہائی اہم کردار اے۔ صدر شی جن پنگ دی دوراندیش قیادت وچ چین نے انسانی ترقی، سائنس، ٹیکنالوجی تے جدت دے شعبیاں وچ بے مثال ترقی کیتی اے۔
وزیراعظم نے آکھیا کہ 2026 دا سال پاکستان تے چین دے سانجھے سفر وچ خصوصی اہمیت رکھدا اے۔ پاکستان تے چین اپنے سفارتی تعلقات دے قیام دی 75ویں سالگرہ منا رہے نیں۔ ساڈے دل اک دوجے نال جڑے ہوئے نیں تے اکٹھے دھڑکدے نیں۔
انہاں آکھیا کہ ساڈی دوستی نے ہمیشہ وقت دے ہر امتحان دا سامنا کیتا اے، چاہے اوہ زلزلے ہون، طوفان ہون یا سیلاب۔ سی پیک ساڈی دیرینہ دوستی تے اپنے عوام لئی زیادہ خوشحال تے ترقی یافتہ مستقبل دے سانجھے عزم دا مظہر اے۔
انہاں آکھیا کہ ہن اسیں سی پیک دے اگلے مرحلے، سی پیک 2.0 وچ داخل ہو رہے آں۔ نویں مرحلے وچ صنعت کاری، خصوصی اقتصادی زونز، انفارمیشن ٹیکنالوجی تے مصنوعی ذہانت، زراعت، کان کنی تے معدنیات اُتے خصوصی توجہ دِتی جائے گی۔
وزیراعظم نے آکھیا کہ پاکستان تے چین دے تعلقات ساڈی خارجہ پالیسی دا بنیادی ستون نیں۔
چینی سفیر جیانگ زائڈونگ نے تقریب توں خطاب کردیاں آکھیا کہ چین تے پاکستان ہر موسم دے تزویراتی تعاون دے شراکت دار نیں۔ پاکستان اپنے اصولی مؤقف، وسیع عالمی وژن تے اعلیٰ سفارتی بصیرت دی وجہ نال بین الاقوامی سطح اُتے ودھدا ہویا اہم کردار ادا کر رہیا اے۔
انہاں آکھیا کہ پاکستان نے کثیرالجہتی تے بین الاقوامی تعاون دی حمایت کیتی اے تے خطے تے خطے توں باہر امن تے سلامتی دے تحفظ وچ اہم کردار ادا کیتا اے۔
وزیراعظم شہباز شریف نے اقوامِ متحدہ جنرل اسمبلی دے 81ویں اجلاس توں خطاب دوران پاکستان دے قومی مفادات دا مضبوطی نال دفاع کیتا۔
چینی سفیر نے آکھیا کہ اقوامِ متحدہ جنرل اسمبلی وچ بین الاقوامی تے علاقائی مسئلیاں اُتے پاکستان دا مؤقف پیش کیتا گیا، جس نوں عالمی برادری ولوں سراہیا گیا۔
