سعودیہ دا دشمن ساڈا دشمن، حوثیاں توں دفاع لئی سارے دستیاب وسائل فراہم کراں گے: خواجہ آصف
سعودی عرب، ترکیہ تے پاکستان معاہدے دے تحت سیکرٹریٹ قائم کر رہے نیں تے اتحاد دا فریم ورک تیار ہو رہیا اے: وزیرِ دفاع، ہور ملکاں دی وی شمولیت وچ دلچسپی، پر فوری طور اُتے ایس اتحاد نوں وسعت دین دا کوئی منصوبہ نہیں، دورہ روم دوران انٹرویو
اسلام آباد وزیرِ دفاع خواجہ آصف نے پاکستان ولوں سعودی عرب نوں ہر ممکن مدد فراہم کرن دا واضح عزم ظاہر کردیاں آکھیا اے کہ حوثیاں دے حملیاں توں دفاع لئی سعودی عرب نوں ہر قسم دے دستیاب وسائل فراہم کراں گے۔
خواجہ آصف نے دورہ روم دوران عرب نیوز نوں انٹرویو دِتا۔ جدوں خواجہ آصف توں پچھیا گیا کہ کی پاکستان نے یمن وچ ایرانی عناصر دے خلاف فضائی حملیاں وچ حصہ لیا، تاں انہاں نے براہِ راست جواب دین توں گریز کردیاں صرف اینا آکھیا کہ جدوں میں آکھدا ہاں کہ اسیں سعودی عرب دے دفاع دے پابند آں تاں ایس دا مطلب اے کہ ساڈے کول جیہڑے وی وسائل نیں، اوہ سعودی عرب لئی دستیاب ہون گے۔
انہاں مزید آکھیا کہ پاکستان دیاں فوجی صلاحیتاں سعودی عرب، ترکیہ تے پاکستان وچکار طے پاؤن والے نویں دفاعی معاہدے دے تحت سعودی عرب لئی دستیاب ہون گیاں۔
رپورٹ وچ دَسیا گیا کہ انہاں حوثیاں دے خلاف کیتے گئے حملیاں وچ پاکستان دے شامل ہون بارے واضح تصدیق نہیں کیتی تے نہ ایہہ دَسیا کہ سعودی عرب ولوں کسے قسم دی مدد دا مطالبہ کیتا گیا اے۔
انٹرویو وچ خواجہ آصف نے حوثیاں نوں جارح قرار دِتا تے آکھیا کہ پاکستان ولوں سعودی عرب نوں مدد فراہم کرن دے عزم وچ کوئی ابہام نہیں اے۔ سعودی عرب دا کوئی وی دشمن پاکستان دا دشمن اے، ایہہ گل بالکل واضح ہونی چاہیدی اے۔
خواجہ آصف نے سعودی عرب، ترکیہ تے پاکستان وچکار طے پاؤن والے دفاعی معاہدے بارے دَسیا کہ ایہہ معاہدہ دفاعی نوعیت دا اے تے ایہہ اتحاد کسے مخصوص ملک دے خلاف نہیں اے۔
خواجہ آصف نے آکھیا کہ ہور ملکاں نے وی ایس اتحاد وچ شامل ہون لئی دلچسپی دا اظہار کیتا اے، پر فوری طور اُتے ایس اتحاد نوں وسعت دین دا کوئی منصوبہ نہیں اے۔
