ضمانت ہون اُتے ملزم نوں بیرونِ ملک سفر دی خودکار اجازت نہیں ملدی: لاہور ہائیکورٹ

چالان شدہ ملزم دا پاسپورٹ ضبط تصور، ضبطی ختم کرن تے بیرونِ ملک سفر دی اجازت دا اختیار انسدادِ دہشتگردی عدالت کول اے، پارلیمنٹ دے بنائے قانون نوں غیر مؤثر نہیں کیتا جا سکدا: فیصلہ، 9 مئی دے ملزم دا ناں پی سی ایل توں کڈھن دی درخواست خارج

لاہور (کورٹ رپورٹر) لاہور ہائیکورٹ نے سانحہ 9 مئی دے مقدمے وچ نامزد ملزم دا ناں پاسپورٹ کنٹرول لسٹ توں کڈھن دی درخواست خارج کر دِتی۔ جسٹس منور اقبال دوگل نے قرار دِتا کہ انسدادِ دہشتگردی ایکٹ دے تحت چالان شدہ ملزم دا پاسپورٹ قانون دے تحت ضبط تصور ہوندا اے۔

عدالت نے آکھیا کہ پاسپورٹ دی ضبطی ختم کرن تے بیرونِ ملک سفر دی اجازت دین دا اختیار متعلقہ انسدادِ دہشتگردی عدالت کول اے، جدوں کہ ضمانت ملن نال بیرونِ ملک سفر دی خودکار اجازت نہیں ملدی۔

لاہور ہائیکورٹ دے جسٹس منور اقبال دوگل نے درخواست گزار دی پٹیشن اُتے 6 صفحات اُتے مشتمل فیصلہ جاری کیتا۔ درخواست گزار خلاف تھانہ سرور روڈ وچ 9 مئی دے واقعات دا مقدمہ درج اے۔

جسٹس منور اقبال دوگل نے فیصلے وچ لکھیا کہ انسدادِ دہشتگردی ایکٹ دے تحت پاسپورٹ ضبط کرن دا اختیار تے اوہدی مدت دا تعین کرنا متعلقہ عدالت دا اختیار اے۔ محض ضمانت منظور ہون نال ملزم نوں پاسپورٹ استعمال کرن یا بیرونِ ملک سفر کرن دی خودکار اجازت حاصل نہیں ہو جاندی۔

عدالت نے آکھیا کہ بیرونِ ملک سفر دی اجازت حاصل کرن لئی ملزم نوں متعلقہ انسدادِ دہشتگردی عدالت نال رجوع کرنا ہووے گا۔

فیصلے دے مطابق ہائیکورٹ اپنے آئینی دائرۂ اختیار وچ براہِ راست ٹرائل کورٹ دے اختیار نوں استعمال نہیں کر سکدی۔ کسے انتظامی حکم یا سٹینڈنگ آرڈر دے ذریعے پارلیمنٹ دے بنائے قانون نوں غیر مؤثر نہیں کیتا جا سکدا۔

عدالت نے ڈویژن بینچ دے مقدمہ ’’فیڈریشن بنام شیخ رشید احمد‘‘ دے فیصلے دی نظیر نوں وی برقرار رکھیا۔ عدالت نے ایف آئی اے تے امیگریشن حکام ولوں 6 مئی تے 19 مئی نوں کیتے گئے اقدامات نوں قانون دے مطابق قرار دِتا۔

سماعت دوران پنجاب حکومت دی جانبوں اسسٹنٹ ایڈووکیٹ جنرل محمد عثمان خان نے درخواست گزار دا ناں پاسپورٹ کنٹرول لسٹ توں کڈھن دی مخالفت کردیاں مؤقف اختیار کیتا کہ متعلقہ اختیار انسدادِ دہشتگردی عدالت کول اے۔

لاہور ہائیکورٹ نے فریقین دے دلائل تے قانونی نکات دا جائزہ لین توں بعد درخواست خارج کر دِتی۔