صومالیہ آپریشن: زندہ بچ جان والا عملہ بحفاظت بندر بیلا پہنچا دِتا گیا

جاں بحق افراد دیاں میتاں پاکستان منتقل کرن لئی ہر ممکن کوشش جاری: دفترِ خارجہ

اسلام آباد ( پاکستان نے صومالیہ دے ساحل دے نیڑے ہائی جیک کیتے گئے بحری جہاز ایم ٹی آنر 25 دی بازیابی دوران عملے دے 5 ارکان دے جاں بحق ہون اُتے افسوس دا اظہار کیتا اے۔

ترجمان دفترِ خارجہ دے مطابق جاں بحق ہون والیاں وچ 3 پاکستانی شہری، رفیع اللہ خان، سید کاشف عمر تے محمود احمد انصاری وی شامل نیں۔

ترجمان نے آکھیا کہ حکومتِ پاکستان تے عوام سوگوار خاندانواں نال دلی تعزیت دا اظہار کردے نیں، مشکل تے تکلیف دہ وقت وچ اساں انہاں دے غم وچ برابر دے شریک آں۔

ایم ٹی آنر 25 دے زندہ بچ جان والے عملے نوں بحفاظت بندر بیلا پہنچا دِتا گیا اے۔

ترجمان دفترِ خارجہ دا کہنا اے کہ حکومتِ پاکستان اپنے سفارتی مشن تے متعلقہ حکام دے ذریعے صومالی حکام تے ہور متعلقہ فریقین نال مسلسل رابطے وچ اے۔

زخمیواں نوں مناسب طبی سہولتاں دی فراہمی تے جاں بحق افراد دیاں میتاں پاکستان منتقل کرن لئی ہر ممکن کوشش کیتی جا رہی اے۔