آف لوڈنگ دا معاملہ، مسافراں دی روانگی توں پہلاں سفری دستاویزات دی جانچ پڑتال شروع
لاہور (سٹاف رپورٹر) پاکستان توں بیرونِ ملک جان والے مسافراں دی آف لوڈنگ دا معاملہ، روانگی توں پہلاں ہی سفری دستاویزات دی جانچ پڑتال دا نواں سلسلہ شروع کر دِتا گیا اے۔
لاہور سمیت ملک بھر دے بین الاقوامی ایئرپورٹس اُتے ایف آئی اے، پاسپورٹ تے پروٹیکٹر اینڈ امیگرنٹس دا عملہ متحرک کر دِتا گیا اے۔ اوورسیز ایمپلائمنٹ ایسوسی ایشن دی درخواست اُتے مسافراں دے ویزیاں تے ہور سفری کاغذات دی امیگریشن توں پہلاں جانچ کیتی جا رہی اے۔
حکام دے مطابق ملازمت، سیر و تفریح، عمرہ یا زیارت لئی بیرونِ ملک جان والے مسافراں نوں پہلے پری امیگریشن کلیئرنس دے مرحلے وچوں گزرنا ہووے گا، جس توں بعد ہی انہاں نوں باقاعدہ امیگریشن لئی اگے جان دی اجازت دِتی جاوے گی۔
حکام دے مطابق آف لوڈ ہون دی صورت وچ ٹکٹ تے ویزا فیس ضائع ہون نال مسافراں نوں کروڑاں روپے دے مالی نقصان دا سامنا کرنا پیندا سی۔ پری امیگریشن کلیئرنس دے ذریعے غیر قانونی بیرونِ ملک سفر دی روک تھام دے نال مسافراں نوں مالی تے قانونی مشکلات توں وی بچایا جا سکے گا۔
