مانیٹرنگ سسٹم نال منسلک نہ ہون والے کاروباری مراکز سیل کرن دا فیصلہ

سیل شدہ کاروبار کھلوان لئی جرمانہ ادا کرن دے نال مانیٹرنگ سسٹم نصب کرنا ہووے گا، کاروباری مقام سیل کرن لئی پولیس دی مدد وی لئی جا سکے گی، سیلز ٹیکس رولز وچ ترمیم

اسلام آباد ایف بی آر نے مانیٹرنگ سسٹم نال منسلک نہ ہون والے رجسٹرڈ کاروباری مراکز خلاف کارروائی دا فیصلہ کر لیا اے۔ ایس حوالے نال سیلز ٹیکس رولز 2006 وچ ترمیم دا نوٹیفکیشن جاری کر دِتا گیا اے، جس دے مطابق پروڈکشن مانیٹرنگ، ویڈیو سرویلنس یا ڈیجیٹل آئی سسٹم نال منسلک ہونا لازمی ہووے گا، جدوں کہ ایف بی آر دے سسٹم نال منسلک نہ ہون والے رجسٹرڈ کاروبار کارروائی دی زد وچ آون گے۔

ایف بی آر دے مطابق ضرورت پین اُتے کاروباری مقام سیل کرن لئی پولیس دی مدد وی لئی جا سکے گی۔ کاروبار سیل کرن دا طریقہ کار وی نوٹیفکیشن وچ واضح کر دِتا گیا اے۔ ایس دے تحت اسسٹنٹ کمشنر ان لینڈ ریونیو یا اوہدی توں اُتے دا افسر تحریری رپورٹ کمشنر ان لینڈ ریونیو نوں دے گا، جس دی بنیاد اُتے کارروائی شروع کیتی جا سکے گی۔

کمشنر ان لینڈ ریونیو انکوائری توں بعد رپورٹ چیف کمشنر نوں بھیجے گا، جدوں کہ چیف کمشنر کاروباری مقام سیل کرن یا نہ کرن بارے تحریری حکم جاری کرے گا۔

ایف بی آر دے مطابق کاروباری مقام دا مکمل یا مخصوص حصہ سیل کیتا جا سکے گا، تاہم سیل کرن توں پہلاں کاروباری شخص نوں حکم دی کاپی دینا لازمی ہووے گا۔

کاروباری مقام اوہدوں تک سیل رہے گا جدوں تک متعلقہ مانیٹرنگ سسٹم ایف بی آر دے نظام نال منسلک نہیں ہو جاندا۔ سیل شدہ کاروبار دوبارہ کھلوان لئی جرمانہ ادا کرن دے نال مانیٹرنگ سسٹم نصب کرنا ہووے گا، جدوں کہ تنصیب دے وقت ایف بی آر دی ٹیکنیکل ٹیم وی موجود ہووے گی۔

ایف بی آر دے مطابق مانیٹرنگ سسٹم نصب ہون توں بعد کمشنر ان لینڈ ریونیو تین دناں دے اندر سرٹیفکیٹ جاری کرے گا۔

نوٹیفکیشن وچ مزید آکھیا گیا اے کہ الیکٹرانک مانیٹرنگ دے قواعد آئندہ ہور کاروباراں تے مینوفیکچررز اُتے وی لاگو کیتے جا سکدے نیں۔