پہلی سمارٹ پیپر لیس ڈیجیٹل کورٹ دا اسلام آباد ہائیکورٹ وچ افتتاح
آزادیٔ رائے حق، ساڈے اُتے تنقید کرو یا تعریف، تسی آزاد او: چیف جسٹس سرفراز ڈوگر
اسلام آباد (اپنے نامہ نگار توں) ملک دی پہلی سمارٹ پیپر لیس ڈیجیٹل کورٹ دا اسلام آباد ہائیکورٹ وچ افتتاح کر دِتا گیا، ہائیکورٹ دی عمارت وچ سائلین تے وکلا لئی فری وائی فائی تے میڈیا سینٹر دا وی افتتاح کیتا گیا۔
چیف جسٹس وفاقی آئینی عدالت امین الدین خان نے کورٹ روم نمبر اک وچ سمارٹ پیپر لیس ڈیجیٹل کورٹ دا افتتاح کیتا۔ ایس موقع اُتے جسٹس عامر فاروق وی موجود سن۔ چیف جسٹس امین الدین نے چیف جسٹس اسلام آباد ہائیکورٹ سرفراز ڈوگر دے نال فری وائی فائی سہولت دا وی افتتاح کیتا۔
اِس توں پہلاں چیف جسٹس سردار سرفراز ڈوگر نے میڈیا سینٹر دا افتتاح کیتا۔ جسٹس اعظم خان تے جسٹس راجہ انعام امین منہاس وی ایس موقع اُتے موجود سن۔
چیف جسٹس سردار سرفراز ڈوگر نے آکھیا، میڈیا دے دوستاں نوں مبارکباد پیش کردا ہاں، آزاد میڈیا لئی اج ہائیکورٹ میڈیا سینٹر دا افتتاح کر رہے آں۔ آزادیٔ رائے سب دا حق اے، بے شک ساڈے اُتے تنقید کرو یا تعریف کرو، تسی آزاد او۔
تقریب وچ پراسیکیوٹر جنرل منظور احمد ججہ، ایڈیشنل اٹارنی جنرل راشد حفیظ، رجسٹرار یار محمد ولانہ، ایڈیشنل رجسٹرار نور محمد مرزا، صدر ہائیکورٹ بار واجد گیلانی، جنرل سیکرٹری قاسم نواز عباسی، ہائیکورٹ جرنلسٹس ایسوسی ایشن دے عہدیداراں تے ارکان نے وی شرکت کیتی۔
