ریمیشن نال عمر قید دی سزا 15 سال توں گھٹ نہیں ہو سکدی: آئینی عدالت

ریمیشن لامحدود صوابدید نہیں، عمر قید دے مجرم دا 15 سال قید کاٹنا لازم، درخواست مسترد، سرکاری ملازم نوں چارج شیٹ توں مختلف یا اضافی الزامات اُتے سزا نہیں دِتی جا سکدی: عدالت، غیر قانونی رولز اُتے ملازماں دی ترقی دے معاملے وچ آئینی درخواست دائر نہیں کر سکدے: تحریری فیصلہ

اسلام آباد (اے پی پی) پاکستان پریزن رولز 1978 دے رول 217(ii) دے تحت عمر قید دے مجرم دی مجموعی ریمیشنب دے نتیجے وچ اوہدی حقیقی قید دی مدت 15 سال توں گھٹ نہیں کیتی جا سکدی۔

وفاقی آئینی عدالت دے جسٹس روزی خان باریچ تے جسٹس سید ارشد حسین شاہ اُتے مشتمل دو رکنی بینچ نے سبا خان دی ایف سی پی ایل اے مسترد کردیاں قرار دِتا کہ جیل حکام ولوں تیار کیتے گئے نومینل رول دے مطابق سبا خان نے 9 سال، 4 ماہ تے 19 دن قید کاٹ لئی سی، اوہدی 15 سال، 7 ماہ تے 18 دن ریمیشن درج کیتی گئی تے 5 ماہ تے 23 دن قید باقی ظاہر کیتی گئی۔

عدالت نے قرار دِتا کہ مذکورہ حساب کتاب پاکستان پریزن رولز دے لازمی تقاضیاں نال مطابقت نہیں رکھدا، کیونکہ ریمیشن دے نتیجے وچ عمر قید دی حقیقی مدت 15 سال توں گھٹ ہو رہی سی۔

جیل حکام قانونی حدود توں تجاوز کردیاں ریمیشن نہیں دے سکدے۔ عدالت نے درخواست نوں میرٹ توں خالی قرار دیندیاں مسترد کر دِتا۔

اِدھر وفاقی آئینی عدالت دے جسٹس روزی خان باریچ نے پشاور ڈویلپمنٹ اتھارٹی دے دو ملازماں دیاں درخواستاں اُتے فیصلہ سناندیاں قرار دِتا کہ کسے سرکاری ملازم نوں چارج شیٹ وچ عائد الزامات توں مختلف یا اضافی الزامات دی بنیاد اُتے سزا نہیں دِتی جا سکدی، جدوں تک اوہنوں نویں الزامات دا مؤثر دفاع کرن دا موقع نہ دِتا جاوے۔

عدالت نے دوناں ملازماں نوں ملازمت توں برطرفی دی تاریخ توں بحال کرن دا حکم دیندیاں پشاور ہائیکورٹ دا 2 مئی 2024 دا فیصلہ کالعدم قرار دے دِتا۔

وفاقی آئینی عدالت دے جسٹس عامر فاروق تے جسٹس علی باقر نجفی اُتے مشتمل دو رکنی بینچ نے سی ای او سیپکو تے ہوراں دی درخواست اُتے تفصیلی تحریری فیصلہ سناندیاں قرار دِتا کہ غیر قانونی رولز اُتے ملازماں دی ترقی دے معاملے وچ آئینی درخواست دائر نہیں کیتی جا سکدی۔

فاضل بینچ نے آئینی درخواست دے ناقابلِ سماعت ہون بارے ہائیکورٹ دا فیصلہ برقرار رکھیا۔