صدر ایشیائی ترقیاتی بینک ولوں ایم ایل ون لئی مکمل تعاون دی یقین دہانی
اے ڈی بی متاثرہ ملکا ں لئی موسمیاتی مالیاتی سہولت قائم کرے: احسن اقبال، ملاقات وچ گفتگو، وفاقی وزیر ولوں ملکی جامعات تے تحقیقی اداریاں نوں کیئرک دے علمی نیٹ ورک نال جوڑن دی پیشکش
اسلام آباد (وقائع نگار) وفاقی وزیر منصوبہ بندی احسن اقبال نے ایشیائی ترقیاتی بینک دے صدر ماساتو کانڈا نال ملاقات کیتی۔ ایس موقع اُتے اے ڈی بی صدر نے ایم ایل ون لئی مکمل تعاون تے آئندہ کیئرک وزارتی کانفرنس لئی حمایت دی یقین دہانی کرائی۔
احسن اقبال نے آکھیا کہ پاکستان صرف معدنیات کڈھن دی بجائے انہاں نوں اعلیٰ قدر دیاں مصنوعات وچ ڈھالن ول ودھ رہیا اے تے وسطی ایشیا دیاں معدنیات نوں عالمی منڈیاں تک پہنچاؤن لئی کیئرک جنوبی گیٹ وے بن سکدا اے۔
احسن اقبال نے موسمیاتی تبدیلی توں متاثرہ ملکا ں لئی اے ڈی بی دی الگ مالیاتی سہولت قائم کرن تے موسمیاتی موافقت تے ماحولیاتی تحفظ لئی اضافی مالی معاونت دی ضرورت اُتے زور دِتا۔ انہاں موسمیاتی خطرات دی نشاندہی لئی مصنوعی ذہانت تے جدید ٹیکنالوجی دے استعمال دی تجویز وی دِتی۔
علاوہ ازیں اولان باتور وچ کیئرک انسٹی ٹیوٹ دی گورننس کونسل دے اجلاس نوں خطاب کردیاں احسن اقبال نے پاکستان سنگل ونڈو دے تجربے تے ملکی جامعات تے تحقیقی اداریاں نوں کیئرک دے علمی نیٹ ورک نال جوڑن دی پیشکش کیتی۔
وفاقی وزیر نے کیئرک انسٹی ٹیوٹ نوں قابلِ اعتماد علاقائی علمی مرکز وچ تبدیل کرن دی تجویز دِتی، جتھے رکن ملکا ں دے تجربات، تحقیق تے معلومات نوں اکٹھا کرکے مشترکہ معاشی تے ترقیاتی چیلنجز دے عملی حل لبھے جا سکّن۔
انہاں آکھیا کہ پاکستان 2027 وچ کیئرک دی صدارت سنبھالے گا تے اپنے دورِ صدارت وچ علم تے تجربات دے تبادلے نوں مرکزی حیثیت دےوے گا۔
احسن اقبال نے علاقائی اعداد و شمار، پالیسی ذرائع، منصوبیاں دے جائزیاں تے عملی تجربات اُتے مشتمل علمی پلیٹ فارم تے ماہرین دی فہرست قائم کرن دی تجویز دِتی، تاں جو پالیسی ساز ہور ملکا ں دے کامیاب تجربیاں توں بروقت فائدہ اٹھا سکن۔
